Sawrkar Damdawi In tha tehna ah tling thar

India rama sawrkar Damdawi In tha bik tehna, National Quality Assurance Standards (NQAS)-ah Lengpui CHC leh Health & Wellness Centre (Sub-Centre) pahnih - Upper Republic HWC (SC) leh Electric Veng HWC (SC) te an tling thar a, heti hian Mizoram chhunga Cummunity Health Centre (CHC) pakua awm zinga pathumin National-Level NQAS Certificate nei tawhin HWC-Sub Centres pathum (3)-in National Certification puitling an nei tawh bawk a ni.

National Health Mission (NHM) Mizoram-a Mission Director, Dr. R Lalchhuanawma chuan NQAS National-Level endiknaa tling thar Lengpui CHC hian a tehnaah 97.59% an hmuh thu leh Upper Republic HWC-SC hian 81.08% hmuin Electric Veng HWC-SC hian 84.10% an hmu bawk tih a sawi a. Heti hian Mizoram chhunga Sawrkar damdawi In 119 te’n NQAS National-Level Certificate an nei mek a. Tunah hian sawrkar damdawi In 47 (HWC Sub-Centre 40 telin) in State-Level NQAS Certificate an nei tawh a, National-Level a endikna tur an dil mek a ni.

NQAS Certified Damdawi In te hi endikna chhawng thum paltlang an ni a, a tawp bera endikna an hmachhawn hi ‘National External Assessment’ niin State pawn atangin Assessor (endiktu) an lo kal thin a ni. Hetah hian a tehnaa 70% an hmuh tlin chuan Certified an ni chauh thin a. Heng Certified tawh damdawi In-ah te hian natna darh thei ven kawngah te, thawktu zawng zawngte’n an hna bil an thiamna te, an Level zelah enkawlna an pek that dan te, a thlawna enkawlna leh damdawi pek te, damdawi In faina leh dik taka damdawi In bawlhhlawh sawngbawl te, hawihawmna leh a chhehvel vawnfai kawngah te, Environment vawn that kawngah te leh khawtlang nena an thawhhonaah te endik thin an ni.