Hri danna pek dan thlirho

Nimin khan State Task Force for Immunization chu Health Department changtu Commissioner & Secretary K. Lalrinzuali hova thukhawmin July ni 1-a National Immunization Day hman tur atana hri danna pek kalpui dan tur an sawiho a. Zeng hri (Polio) bikah chuan India ram chu kum 2014 khan Polio um bo tawhna ram a puan ni tawh mah se, Polio natna la awmna ram Pakistan te, Myanmar leh Bangladesh ten an hual avangin immunization programme hi la thlah theih a nih loh thu tarlan a ni a. National Immunization Day atan Mizoram chhungah chenna In 268,925 tuam tawh niin, naupang kum 5 hnuailam mi 1,02,823 an tel a ni. Hmeichhe Chhul hmawr Cancer venna, HPV Vaccine chungchang report-a a lan danin kumin June 17 thlengin Mizoram-ah HPV hi mi 10,351 hnenah pek tum (target) chu 99% pek zawh tawh a ni a, Serchhip, Lawngtlai leh Siaha District-ah coverage a hniam thu tarlan a ni bawk.