Serchhip-ah thisen petu pawl hrang hrangte chawimawina hun DIPRO hovin hman a ni
‘World Blood Donor Day’ hi kum 2004 atang khan kumtin June 14-ah hman thin niin kumin hian Pathianni-ah a tlak avangin Serchhip-ah chuan nimin khan Mizoram State AIDS Control Society (MSACS); District Hospital Serchhip-a Blood Centre leh Association for Voluntary Blood Donation (AVBD) Serchhip Branch te huaihawtin Serchhip Sub-Hqrs. YMA Hall-ah hman a ni a. Khuallian ni-a he hun hmanpuitu Serchhip District Information & Public Relation Officer, Pu R. Vanneihtluanga chuan thisen pek chu midangte nunna chhanna pawimawh tak a nih thu sawiin, “Thisen kan pek hian mi tam tak nunna kan pawhsei sakin kan chhan a ni mai lova, thisen mamawhtu, retheihna avang te, natna khirh tak avangte a indawm kun mekte chuan thlamuanna hlu tak an lo neih phah thin a ni,” tiin thisen pek ngai pawimawha, mi dangte tana malsawmna nih tum zel turin he huna kalkhawmte chu a chah a. Thisen petute chawimawina hun buatsaih a ni chu lawmawm a tih thu a sawi bawk.
He hunah hian District Hospital Serchhip Blood Centre-a Officer, Dr. Lalruatliana Pachuau leh Association for Voluntary Blood Donation (AVBD) Serchhip Branch-a President, Zonunsanga Kawlni te pawhin thu an sawi bakah Blood Centre-a Technician, Lalhruaitluanga chuan Report a pe bawk a. April 1, 2025 leh March 31, 2026 inkara District Hospital Serchhip Blood Centre-a tlawmngaia thisen petu pawl hrang hrang 29 te hnenah lawmthu sawina leh chawimawina thilpek hlan a nih bakah AVBD Serchhip Branch-a Secretary, T. Biakchamliana kaihhruaiin he huna tel te hian World Blood Donor Day puala thutiam chu an chham rual bawk a ni
April 1, 2025 atanga March 31, 2026 chhung khan District Hospital Serchhip Blood Centre-ah hian thisen Unit 690 pek niin heng zinga Unit 590 chu Voluntary Donation a ni a, hemi hun chhung hian Blood Donation Camp tum 31 huaihawt niin pawl pahnih te chuan tum hnih an pe hman a. Hemi hun chhung vek hian thisen Unit 560 pekchhuah a ni.
Serchhip-a World Blood Donor Day puala hun hman hi AVBD Serchhip Branch-a Vice President, Ramdinthara Kawlni chuan kaihruaiin kum kalta chhunga thisen petu pawl hrang hrang aiawhte bakah Govt. Higher Secondary School Serchhip leh Brilliant Higher Secondary School Serchhip-a zirlaite an tel a ni.