Red Card dilna mi 90 in lain thehlut an la awm lo

Excise & Narcotics Department-in hriselna kaihhnawih avanga Sapzu (IMFL) kawl leh Zu in phalna 'Red Card' an pekchhuah turah mi 90 in dilna form an lachhuak tawh a, dilna thehlut erawh an la awm lo thung.
Thuthar thehdarhtute zawhna chhangin, Excise & Narcotics Department-a thawkte chuan Red Card hmanga IMFL hralhchhuak tur hian engkim peihfel a ni tawh tih sawiin, Red Card dilna tur Form lakchhuahna turin Commissionerate Office Ground Floor-ah desk siam a ni tih an sawi a, tun thla June ni 3 atang khan Red Card dilna form an pechhuak tan tawh a, nimin June ni 19, 2026 thleng khan mi 90 hnenah pekchhuah a ni tawh tih an sawi a ni.

Red Card nei tur hian Doctor te'n damdawi atana an chawhna lehkha an neih hnuah an awmna District Medical Superintendent ten an chawhna chhante enfiahin, phalna an pekte hnenah chauh Red Card hi pek an ni dawn a. Red Card hi kum khatah Rs. 5,000 man zel a ni dawn a, Aizawl-a Excise & Narcotics Department Pisa-ah END chuan ‘Departmental Store’ siamin, Zu an man, Court-in a tihfel tawhte chu Red Card neite tana hralhchhuah a ni dawn a. Zu chu a man pangngai aia zaa 75-a tlawmin hralh a ni dawn a ni.

Thudawn dawnin Red Card hi Mizoram Liquor Prohibition (Amendment) Act, 2025-in a ken tel a ni a, kum 21 tling chinte chauh phalna hi pek tura ruahman niin Red Card neite hnena zu hralhna atanga sum lut chu Finance Department ah a lut zel dawn a, hmun dangah lei phal a ni dawn lo bawk a ni.

Hei bakah hian END-a thawkte chuan Mizoram-a kuthnathawktute hlawkna chu sawrkarin a duh ber avangin, Hnahlan leh Champhai Winery atanga siamchhuah Grape Wine zuar turin phalna bik a ngai tawh lova, tute pawhin an zuar thei tawh tih an sawi bawk a ni.