Border Security Force (BSF) sipai, Silsuri West-a post an nih laia hmeichhia pawngsual rawn (gang rape)-a a hnua acid-a leih zuia puhte chu thiamloh chantir an nih hnuah Addl. District & Session Judge I, Sylvie Z. Ralte chuan kum 42 chhung lung In tang turin an chungthu a rel sak. He thubuai-a inhnamhnawih a puh BSF sipai Nilanjan Das leh Dinesh Kumar te hi tun thla ni 12 khan Court chuan thiamloh a lo chantir tawh a, tun tum hi Mizoram chhunga Court-in acid hmanga inbeih a rel vawi khatna leh hremna an pek hmasak ber nia hriat a ni. Tarlan tawh angin hemi chungchang ah hian July 18, 2017 khan Marpara Police Station-ah thubuai ziahluh a ni a, FIR-a tarlan a nih danin July 16, 2017 khan hmeichhe pahnih ramkal zinga pakhat chu mi pahnih in pawngsual rawnin a hmai chu ‘vun tikang thei’ in an leih zui a, pakhat hi a chin hriat loha awmin a hnuah a ruang hi hmuh a ni bawk a ni.
