Sairang Railway Station-ah hnatlang neih a ni

Northeast Frontier Railway (NFR) chuan boruak thianghlim leh tualzawl mawi zawk neih a nih theih nan bakah zin veivakte tana hmun nuam zawk siam turin Sairang Railway Station-ah faina hnatlang neiin thingphun beihpui an thlak bawk.

He hnatlang hi Mizoram Sawrkar Environment, Forest & Climate Change Department leh 'Clean & Green Revolution Mizoram' te nen tangho a buatsaih niin Railway Station chhung leh a velte tihfai a nih bakah Pangpar huante siamin, Station chhevel a hrin lehzual theihnan Forest Department atanga dawn April Par tiak 50 leh Chawnpui thing tiak 50 phun a ni bawk a. Heng thingphunte hian Station velah boruak thianghlim zawk siamin, nungchate tan leh khawtlang mipuite tan boruak tha zawk a thlen beisei a ni.

He huna thu sawitu Clean & Green Revolution Mizoram Chairperson Lalmalsawmi chuan Sairang Railway Station chu India rama Railway Station fai leh hring mawi ber zinga mi nih tir chu an thupui a nih thu a sawi a. He hmalakna atana NFR leh Mizoram Sawrkar hmalakna chu lawmawm a tih thu a sawi bawk a. He hunah hian Agni Mitra, Conservator (Planning), Forest Department bakah Zo Highways and Agriculture Development Company Ltd. Chairman J.K. Dawngzuala leh NFR Lumding Division-a hotulute an tel a, Sihhmui Self-Help Group, Sairang Commercial Vehicle Union, tualchhung mite leh Railway hotute hnatlang ah hian an tel bawk a ni. NFR chuan sawrkar leh tualchhung pawl hrang hrangte nen tangkawpin khuarel humhalhna kawngah leh hmasawnna tlo awm theih nan hma a la chhunzawm zel dawn tih an sawi a ni.