Thla thar atangin VB - G RAM G hman tan tur niin Mizoram-in kum khat ah cheng vbc. 1189 a mamawh
.jfif)
Rural Development & Administration thawktute sawu danin Viksit Bharat - G RAM G Act, 2025 hi thingtlang mite hmasawnna leh inhlawhna tur siamna dan a ni a, a tum ber chu thingtlang hmasawnna leh kum 2047 a Viksit Bharat- India ramin intodelh, ram changkang nih a tumna nen thlunzawma thingtlang-a changte tana kum khat-ah ni 125 inhlawhna siam leh hmasawnna ruhrel tha leh tlo siam/din a ni a. VB-G RAM G Act hi July 1, 2026 atangin India ram State hrang hrangah kalpui tawh tur a ni a, he dan hian sawrkar kum khat (Financial Year) chhungin thingtlanga he danin a sawi anga thawk thei/tling chhungkua ami, kum 18 tling chin leh hnarum (unskilled work) thawk hreh lo te tan ni 125 inhlawhna siam a tiam a ni.
MGNREGA hnuaia hnathawh mekte chu VB G-RAM G thawh tan hunah pawh ngaihpawimawh chhunzawm zel a thawh chhunzawm zel tur a ni a, vantlang hmasawnna ruhrel thawh mekte thawhzawh loha dah loh tur a ni. He dan tharah hian thingtlanga cheng chhungkua atangin kum 18 tling, hnarum thawk hrehlo te tan sawrkar kum khat chhungin ni 100 ni tawh lovin ni 125 inhlawhna ngialnghet (guarantee) an nei thei tawh dawn a, VB – G RAM G hnuaia a thar pek an nih hma loh chuan MGNREGA Job Card neitute, e-KYC tifel tawh te chu he dan thar hnuaiah hian an inhlawh chhunzawm zel thei dawn a ni.
RD&A thawktute sawi danin thingtlanga cheng chhungkua MGNREGA Job Card nei lo te chuan an hming, kum zat, address leh chhungkaw details te chu VC te hnenah thehlut in Gramin Rozgar Guarantee Card an dil thei dawn a. Thingtlanga cheng chhungkua kum tling te chuan inhlawhna VC te kaltlangin an dil thei ang a, inhlawhnate chu dil a nih atanga ni 15 chhungin siam tur a ni. Ni 15 chhungin inhlawhna pekchhuah loh an nih chuan Un-Employment Allowance an dil thei dawn a, Un-Employment Allowance hi ni 30 chinah chuan Wage rate hmun li-a thena hmun khat nitin pek tur a ni a, inhlawhna pek loh a la nih zel chuan ni 30 pelh hnu hi chuan Wage rate zahve nitin pek tur a ni. Hlawh hi kartin emaw, Muster Roll khar atanga ni 14 aia tlai lovah pek thin tur a ni a, hlawh te hi inhlawha te mimal account-ah Direct Benefit Transfer hmanga thun zel tur a ni.
Hlawhte chu Muster Roll khar atanga ni 15 chhunga pek a nih loh chuan an hlawh pek loh ni zawng atan nitin ‘delay compensation’ 0.05%-a chhutin pek theih an ni a. He dan thar hnuaiah hian attendance hi hnathawhna hmunah Face Authentication kaltlanga lak thin tur a ni a, Network tha lo emaw, Technical lam thil emaw, Attendance lakna hmanrua (device) lamah harsatna a awm vang leh harsatna bik thilah chuan sawrkar-in inkaihhruaina a siam angin ngaihhnathiamna (exemption) a dil theih ang.
Hnathawhna ah khawl lian te hman phal a ni lo a, hnathawh te reng reng chu mihring tha seng a thawh thin tur a ni a, loh theih loh a nih loh chuan hna thawktu (labour) ti tlem thei tur hmanrua/ khawl hman loh tur a ni.
Zawhna chhangin RD&A thawktute chuan kum khat atan VB - G RAM G atan hian Mizoram chuan cheng vbc. 1189 mamawh tura chhut a ni a, heng zinga vbc. 1070 hi sawrkar laipui leh vbc. 118 hi State sawrkar tum tur a ruahman a ni a. MG-NREGA-ah hian hnathawktu pakhatin ni khatah Rs. 281 an hlawh a, VB - G RAM G ah hian hlawh zat tur hi la tihchian a la ni lo a, tlema tihsan a nih rin a ni a. Job card pawh MGNREGA rin phawt tur a ni a, mahse Design thar siam tum mek a ni.