Spa-a thawk tura hruai Police ten Mizoram thlenpui

Kolasib District chhunga hmeichhe naupang pakhat, Spa a thawk tura hruai chu West Bengal Police ten manin hun engemaw chen enkawl anih hnuah kar kalta Ningani, June 18 khan Kolasib rawn thlenpui a ni.
Kolasib atanga chhuak chanchinbu ‘Kolasib Aw’ tarlan danin he hmeichhe naupang hi Maharashtra-ah Spa-a thawk tur leh thla khata Rs. 12,000 hlawh turin mi pahnih in an hruai a, kalkawng-a kal man leh ei leh in zawng zawng pawh a hruaitute hian an tum sak vek bawk a. Rel hmangin hmeichhe tleirawl leh a hruaitute hian Maharastra an pan a, mahse West Bengal an thlen hian Police ten nu leh pa tel lo bakah amah enkawltu tura ruat (Guardian) ni lo ten an hruai chu ringhlelin an hreng a. Tleirawl hi Nadya District Child Welfare Committee (West Bengal) kutah hlanin a hruaitute erawh an hreng thung a. Spa-a thawk tur anga hruaitute hi Kolasib District-a hmeichhe pakhat leh Serchhip District-a cheng a thianpa te niin February ni 12, 2026 khan Sairang atangin Rel-in an chhuak a, mahse February ni 14, 2026 khan West Bengal Police te chuan ringhlelin a hruaitute hi 'Human Trafficking' thubuai an siamsak nia thudawn a ni.

Tleirawl hi Nadya District Child Welfare Committee chuan an District chhunga 'Home for Girls' ah hun engemaw chen an dah a. Nadya District Child Welfare Committee te hian Kolasib District Child Protection Unit te chu be pawpin June ni 16, 2026 khan Nadya District-a Child Welfare Officer Puja Nandi kaihhruaiin an dah lailawkna Home for Gilrs-a thawktu pakhat leh Police Officer pakhat chuan Mizoram an rawn panpui a, June ni 17,2026 zan khan Sairang thlengin Kolasib DCPU kutah hlan a ni a, tunah hian Home ah dah hrih a ni.