Union Minister in Aizawl-ah thuthar thehdarhtute a kawm

Union Minister of State for DoNER leh Education Dr. Sukanta Majumdar chuan tunhma chuan Mizoram-ah Rel a lo lut ang tih rin thiam a har thu sawiin, tunah chuan Prime Minister Narendra Modia hmalaknaa Rel a luh tak thu a sawi.

Nizan hmasa khan Aizawl-a Hotel Platinum-ah BJP Mizoram hruaitute nena thuthar thehdarhtute an kawmna ah he thu hi sawiin Union Minister chuan India ramin zalenna a hmuh hnua a tum khatna atan Mizoram-a Rel a lut chu lawmawm a tih thu a sawi a. Tlang chhengchhiaa Rel kawng lian chi, Broad Gauge km 50 chuang hret siam a ni thei chu mithiamte kutchhuak hlu tak a nih thu a sawi a. Heng zawng zawng a thlen theihna chhan chu Prime Minister in ram chhung hmun dangte ruala ke pena tlawhpawh awlsama khawilai pawh siam a duh vang a nih thu a sawi a ni.

Rel mai bakah kawngpui siamthat lamah pawh hmalak niin hmun hrang hrangah kawngpui siamthatna tur sum pekchhuah a nih thu a sawi a. Zirna lamah pawh Eklavya Model Residential School (EMRS) 11 a awm tawh thu leh paruk dang a rawn awm leh dawn thu a sawi a. Zirna In a pun thu leh Zirtirtu pawh an pun zel thu a sawi a, zirna in hma a sawn zel thu a sawi a ni. Hei bakah hian Prime Minister kaihhruaina hnuaiah ramin hma a sawn zel thu sawiin Union Minister chuan India ramin tuna a tum ber chu ram hmasawn, Viksit Bharat a nih thu a sawi a, hemi a thlen theihna turin hmarchhaka State tin te pawhin hma an sawn deuh deuh a ngaih thu a sawi a. Zawhna chhangin khawvel hmun danga buaina in kawng hrang hrang in kan ram ei bar nghawng mah se hmarchhak Bial leh a bikin Mizoram hmasawnna tura sawrkar laipuiin a ruahman tawh te a tih khaihlak dawn loh thu leh kalpui vek a nih dawn thu a sawi bawk.