Larsap in hun a hmanpui

Mizoram Larsap, General (Dr) Vijay Kumar Singh nimin khan St. Paul's Higher Secondary School, Montfort Hills, Tlangnuam, Aizawl-in kum 2026-2027 chhunga zirlai hruaitu tur House Captain thlan thar 20 te lakluhna hun, ‘Investiture Ceremony 2026’ an buatsaih chu a hmanpui a, Larsap chuan hruaitu thlan tharte chu duhsakna hlanin, anmahni thlanga an chunga rinna nghattute beiseina tihpuiltling tura taimakna, thuhnuairawlhna leh inpekna nena hna thawk turin a fuih a. Hruaitu dik tak nihna chu midangte hnena thupek ah ni lo, rawngbawl sakah a innghat zawk tih sawiin, “Hruaitu tha chuan ngun taka ngaithlain thil nih dan a hrethiam zung zung a, entawntlak taka nungin mite a hneh thin a ni,” a ti. He hunah hian School Principal Brother Kuriyan M.S. chuan inlawmna thu sawiin, Khualzahawm David H. Lalthangliana, AIG (Hqrs), PHQ chuan House Captain thlan tharte endikna hun a hmang a. Principal kaihhruai in thutiam an la bawk a ni.