Khamrang leh Sairang inkar kawng ah nikum-a harsatna ang thleng tawh lo tura beisei a ni
Chief Minister Lalduhoma chuan nimin khan National Highways & Infrastructure Development Corporation Ltd. (NHIDCL)-a Managing Director (MD) Dr. Krishan Kumar chu CM Conference Hall-ah Mizoram-a NHIDCL hnathawh hrang hrangte thlirhona a neihpui a, he hunah hian NHIDCL enkawl kawngpui hrang hrang dinhmun thlirho niin National Highway-06 Vairengte - Sairang kawngpui repair and maintenance chungchang tarlan ah Khamrang to Sairang siam that hna chu an thawk zo tawh tih tarlan a ni a, Kolasib lam Section pawh an thawh zel thu an sawiin, nikum lama harsatna ang kha kumin-ah chuan a thleng lo tura ngaih a ni tih an sawi a. Hei bakah hian Aizawl - Thenzawl Road National Highway-a siam tura DPR siamtu tur zawn mek a nih thu leh Tender hi tun thla tawpah hawn tur a nih thu tarlan a ni a, Dr. Krishan Kumar chuan, “Alignment hi kumin-a peihfel kan lo tum ang a, nakum-ah sanction neih hman kan lo tum dawn nia,” a ti a ni.
Seling - Tipaimukh National Highway-a Tuirini Lei leh Tuivai Lei chu a rang lama siam that a tul thu Chief Minister chuan sawiin, “Permanent Bridge siam tura hun engemaw chen a mamawh rih dawn avangin tuna Bridge awmsa hi a ranglama thuamthat phawt nise,” an ti a. Tlabung leh Kawrpuichhuah inkar National Highway chu NHIDCL kut-a dah tawh tur niin tihfel thuai nise an ti a. Vairengte leh Sairang/Aizawl inkar Four Lane National Highway hnathawh meka harsatna hrang hrang te, Aizawl - Tlabung National Highway thawh mek a harsatnate chu a rang lama chinfel dan tur an sawi nghal bawk a ni.
Heng bakah hian National Highway laih tharin a hèl, National Highway hlui lo ni ta hmun thenkhat NHIDCL lamin ‘One Time Improvement’ an tih hnua State PWD hnena hlan tur chungchang pawh sawiin, NHIDCL lamin ‘One Time Improvement’ a lo tih tawh te chu State sawrkara hlan an ni anga, an la tih loh te chu NHIDCL in thawkin State sawrkar-ah hlan a ni anga, Thingfal khuaa Biak In chim leh School sawn ngaite saktthatna tur DC Lunglei-in proposal a thehluh chu Dr. Krishan Kumar hian a lo enchian tur thu Chief Minister hi a hrilh bawk a ni.