Kuthnathawktute dehchhuah awmze neia tihralna tura ruahman ‘Horticulture Fair’ neih tan a ni
Lammual-a ‘Horticulture Fair’ hawnna hunah hian Horticulture Minister C. Lalsawivunga chuan Mizoram chu UT a nih atangin kum 50 chuang leh State puitling a hlankai a nih pawh kum 40 dawn a ni tawh chungin thil siamchhuah leh dehchhuah sawi tham a la nei lo tih sawiin, chu chuan Mizote chu kan la intodelh loh zia a entir tih a sawi a. Chuvangin he Fair atang hian hmasawnna kawng kan ngaihtuah a tul thu sawiin, “Ram leh hnam intodelh ni turin tan kan lak a ngai a ni,” a ti. Organic Farming chungchang pawh sawiin Minister C. Lalsawivunga chuan, State dangte’n Mizoram Sawhthing an duh bik chhan chu Chemical tel lo, Organic a nih vang a nih thu a sawi a, chuvangin thlai leh thei chingtute chu ‘Organic’ thei ang bera ching turin a chah a, India rama loneitu dangte’n an chin ve loh ching tura fuih bawkin, Mizoram sawrkar chuan ‘Sapthei’ hmangin Pilot Project kalpui chhoh a tum mek thu a sawi bawk.
‘Horticulture Fair’ hawnna hun hi Horticulture Department Director CH. Lalmuanpuia chuan kaihruaiin he hun hmanpuitu Minister of State Prof. Lalnilawma chuan Minister C. Lalsawivunga kaihhruaina hnuaiah Horticulture Department-in nasa takin hma a sawn thu a sawi a, Mizoram chu a sik leh sa in a zir avangin thei leh thlai a tha duh em em a, chuvangin Horticulture Department chu Mizoram hmasawnna atana department pawimawh berte zinga mi a nih thu a sawi a. He hunah hian MIFCO Chairman Lalthazuala te pawh an tel bawk a ni.
Horticulture Fair hi kum 2012 atang khan neih thin niin kumin hi a vawi 13-na a ni a, Horticulture Department chuan Thei leh Thlai chingtute, Pangpar chingtute leh a zuar thin te, Thei leh Thlai vawnthat theih siam lama tui mite pualin a buatsaih thin a. He hun hi Fur ruahtui Mizoramin a dawn that hun, thei leh thlai chi hrang hrang kan phun hun mil ber turin June thla-ah neih thin a ni ber a. Kum 2012 atanga 2025 thlenga Stall neitu ten an hralhchhuah tawh zat belh khawm chu Rs. 3,76,90,607/- a ni.
Horticulture Fair 2026 hi ni li awh (17 - 20 June, 2026) tura ruahman a ni a, Bonsai siam leh enkawl dan te, Greenhouse enkawl dan te, Thlai venhimna damdawi hman dan te, Pangpar khawi dan te leh Bamboo Vinegar hman dan te inzirtirna hun hman tura ruahman a ni a. Stall inpho hi a vaiin 273 a awm a ni.