Thenzawl Joint YMA te bawlhhlawh paih Motor hlan
Thenzawl Bazar Veng-a Joint YMA Hall-a Motor inhlanna hunah hian Chief Minister Lalduhoma chuan Mizorama khualzin lo kal ten min fak thinna langsar tak mai chu khawi hmun pawh a lo thianghlim viau zel hi a nih thu sawin, “Faina leh thianghlimna hian kan ram leh hnam a chawimawi mek a ni. Chuvang chuan Mizoram mipuiten faina kan uar deuh deuh a ngai,” a ti a. Thenzawl khua chu India ram huapa Mizoram khaw lar ber zinga mi a ni mek tih sawiin, “A hmunhma a remin a, khualzin pawhin an hre tawh hle a, tlawhtu pawh in ngah tial tial a. Khaw dang zawng zawng aia in lo fai bikte pawh hi a tul ve a. Chumi hre chung chuan Formosa Foundation pawhin he lirthei hi an rawn pe che u a ni,” tiin Faina leh thianghlimna uar deuh deuh turin a chah a, Thenzawl-ah Home Stay tam zawk siam a nih tur thu a tarlang bawk.
Thenzawl Joint YMA hnena Motor hlanna hun hi Joint YMA President Lalmuanpuia chuan kaihruaiin he hun hmanpuitu Baryl Vanneihsangi MLA pawhin faina chu hriselna bakah min tizahawmtu a ni tih sawiin, “Thenzawl hian paltlangtu leh tlawhtu a ngah avangin fai taka enkawl hi mi dangte entawn atan pawh a tul a ni,” a ti a. Fai leh thianghlim taka kan awm theih nan bawlhhlawh tha taka sawngbawl a pawimawh thu a tarlang bawk a ni.
Nimin-a he hun hman ah hian Vantawng Group YMA Secretary Samuel Lalrinpuia chuan inlawmna thu sawiin, Formosa Foundation-a Chairman Jonathan Lalremruata pawhin thu a sawi a, Formosa Foundation-a Legal Advisor, Clinton Sherwood-a kaihhruaina hnuaiah lirthei inhlanna hi neih zui niin Thenzawl Joint YMA Secretary, RLC. Lalrinfela chuan Report a pe bawk a, he hunah hian YMA hruaitu thahnem tak an tel a ni.