Thisen pek tlawmngaihna lanchhuahna a nih thu sawi

Health Minister Lalrinpuii chuan thisen pek chu tlawmngaihna lanchhuahna a nih thu sawiin, tlawmngaia thisen pe thin te chu pe chhunzawm zel tura a duh thu a sawi bawk.

June 14-a hman thin ‘World Blood Donors Day’ chu nimin khan Aizawl Khatla-a BSI Hall-ah hman niin he hun hmanpuitu Health Minister Lalrinpuii chuan Mizo nun ze mawi ‘tlawmngaihna’ chu vawn nun zel a pawimawh thu sawiin, thisen pek chu tlawmngaihna lanchhuahna a nih thu a sawi a. Mizoram pawna awm Mizote’n midangte nun chhan nana thisen an pe thin chu a chhuanawm a tih thu sawiin, hmun-danga awmte’n Mizo nun mawi an hriat theihna pawimawh a nih thu a sawi bawk a. Mizoram chhungah mimal tlawmngai leh pawl thahnemngai te’n thisen an pe thin chu fakin, chhunzawm zel turin a duh thu a sawi bawk.

Health Minister chuan khawvel chu damdawi leh zirna lamah hmasawn mah se, thisen siam dan an la hmuhchhuah loh avangin thisen pek leh a petu te chu an hlu em em tih a sawi a, thisen pek chu uar zual turin kalkhawmte chu a chah bawk a. Thisen pek tluk zetin thisen thianghlim a pawimawh thu sawiin, mitinte chu nun uluk tur leh hriselna atana pawi thei ruihhlo te, mipat hmei-chhiatna thianghlim lo te lakah invawng tur leh fihlim turin mipuite chu a chah a ni.

He hunah hian kum kalta chhunga thisen pe tam pawl hrang hrangte hnenah chawimawina hlan a ni a, Mizoram-a thisen pe tam ber chu National Service Scheme (NSS), Mizoram niin thisen Unit 6250 an pe a, Central Kristian Thalai Pawl ten Unit 5251 pein Mizoram Thalai Kristian Pawl ten Unit 2891 an pe bawk. Pawl hrang hrangte zinga thisen pe ngun ber chu NSS Unit, Govt Hrangbana College niin vawi 8 an pe a, NSS Unit, Pachhunga University in dawtin vawi 6 an pe bawk.