IT Skill Development & Training Centre-te hlanfel
‘IT Skill Development & Training Centre’ te inhlanna pual hian Mizoram Secretariat Conference Hall No-I ah Information & Communication Technology (ICT) Minister Dr. Vanlalthlana kaihhruaina hnuaiah hun hman niin ICT Secretary Dr. YLN Reddy; Higher & Technical Education Department Commissioner & Secretary Dr. Lalrozama; School Education Department Secretary Ramdinliani leh Secretariat leh Directorate-a thawktu pawimawhte telin MoA sign zawhah Project chu a hmangtu tur Department-te hnenah hlan a ni a. He Project hi a kimchangin zawhfel tawh a ni a, zirlaite, zirtirtute leh mipuite hman nghal theih tura peihfel niin he Project inhlan chhawnna hi Mizoram sawrkarin ICT zirna leh thiamna hmasawnna atan leh Technology hmanga zirna tihhmasawnna pawimawh tak a thlen theihna tur atana duan a ni.
He project hi ‘Establishment of IT Skill Development & Training Centres in Minority Concentration Areas of Mizoram under PMJVK’ tih niin ICT Department hnuaia Mizoram State e-Governance Society (MSeGS) hnuaiah kalpui a ni a. Project zawng zawng atana sum hman chu Centre pakhat-ah cheng nuai 99, a vaiin cheng vbc. 6.93 a ni a, Central leh State in 90:10 in an in tum sem a ni. He project hi Minority Concentration Area-a chengte, zirlaite leh zirtirtute tan Computer leh Digital thiamna, Computer zirna tha zawk leh Technology hman kawngah hmasawnna siam tumna a ni.
IT Skill Development & Training Centre-te hi Mizoram chhunga hmun 7-ah din a ni a. College pahnih- Govt. Kamalanagar College, Chawngte, Lawngtlai District leh Govt. Zawlnuam College, Zawlnuam, Mamit District-ah te dah a nih bakah Govt. Diltlang High School, Diltlang, Lawngtlai District; Govt. Bungtlang South High School, Bungtlang South, Lawngtlai District; Sports School Campus, West Phaileng, Mamit District; Govt. Lungsen High School, Lungsen, Lunglei District leh Govt. Bunghmun High School, West Bunghmun, Lunglei District ah te dah a ni bawk.
Heng Centre-ah hina Trainer Laptop 1, Trainee Computer System 50, Online UPS (5 KVA) 1, Digital Multifunctional Copier Machine 1, Smartboard with CPU 1, Digital Podium 1 leh Local Area Network (LAN) Facility te pek niin Civil works, IT equipment installation, Geo-tagging leh Financial Progress te chu azaa za zawhfel a ni tawh a ni.