Loneitute hmasawnna atan mithiam leh loneitute tanho a tul thu Larsap in a sawi
Central Agricultural University (CAU), Imphal hnuaia thutkhawm pawimawh tak tak pathum - 15th Research Council Meeting, 11th Extension Education Council Meeting leh 33rd Academic Council Meeting te chu nimin khan College of Veterinary Sciences & Animal Husbandry (CVSc& AH) Selesih, Aizawl-ah Larsap General (Dr) Vijay Kumar Singh chuan hawngin Central Agricultural University chu hmarchhak State Agriculture Sector-a hmasawnna thar thlentu pawimawh tak a nih thu leh Council pawimawh tak tak neih tur pathum - Reserch Council, Extension Education Council leh Academic Council-te chuan Laboratory hna, loneitute thleng pha leh Classroom zirna thleng a huam kim vek avangin thiamna a tak ngeia hman tangkaina a lantir tih a sawi a. Hmasawn tura District leh khawtlang hrang hrang ten awmze nei taka hma an lak theih nana ruahmanna siam a tul thu leh tumah hmaih bik awm lova Agriculture leh a kaihhnawiha tanlak nasat a tul thu sawiin, Agriculture Sector chu thingtlanga chengte innghahna mai a ni lova, dik taka kalpui a nih chuan danglamna nasa tak thlen thei leh India ram hmasawn Viksit Bharat siam kawnga tangkai tak a nih thu a sawi a ni.
Sawrkar laipuiin loneitute hmasawn nan ruahmanna hrang hrang a siam thu leh hemi tihpuiltling tura mithiamte leh loneitute pawh tan ho a tul thu Larsap chuan sawiin, Scientist, College-a thawkte leh zirbingmi kalkhawmte chu thil thar leh tha zawk ngaihtuah chhuaka loneitute tha taka kaihruai turin a fuih a. Thiamna ten tumah hmaih bik awm lova mitin a thlen phak nan Awareness Campaign lamah hma la zel tura fuihin, tharchhuah ringawt ah duh tawk mai lova, a hralhna changtlung tak a awm theih nan a sawngbawlna, tihhmelmawina, entrepreneurship, ei leh in rintlak leh him siam bakah leilung nena inrem dehchhuah lama ngaihtuahna seng turin a chah bawk a ni.
India hmarchhaka Agriculture leh a kaihhnawih tihhmasawn kawnga CAU hnuaia mithiam tak takte hmalakna fakawm a tih thu pawh Larsap chuan sawiin, Larsap a nih angin a tawiawm zel dawn thu a sawi a. Council pathum Meeting tur chuan rah tha tak a chhuah ngei a beisei thu leh India hmarchhak hmasawnna leh Viksit Bharat hlawhtlinna chu peng hrang hrang - Laboratory, Classroom leh Loneitute hnathawhna hmunah a innghah tlat thu a sawi a. Kalkhawmte chu Mizoram leh hmarchhak State ten hma an sawn zel nana theihtawp chhuahpui-ah a sawm bawk a ni.
Tun thla ni 24 thleng awh tura ruahman heng thutkhawm hawnna hunah hian CAU-a Vice Chancellor Dr. Anupam Mishra chuan inlawmna thu sawiin, Central Agricultural University chu India rama Agriculture University tha berte zinga mi a nih thu a sawi a. Hmarchhak State-a danglamna nasa tak awm chuan Agriculture leh a kaihhnawih tihhmasawn kawngah remchanna nasa tak a pek thu sawiin, hmarchhak leh India ram hmasawn nan an thawk zel dawn tih a sawi bawk.
He hunah hian Comilla Cotton Meditech product 4 te chu Larsap hian tlangzarhin Central Agricultural University buatsaih lehkhabu 7 a tlang-zarh bakah Aizawl, Saitual, Serchhip leh Cham-phai District atanga loneitu thlanchhuah te hnenah Lavender leh Coriander chi a sem nghal bawk a ni.
Tun dinhmunah CAU-in hmarchhak hmun hrang hrangah College 13, KVK 6, Multi Technology Testing Centre 6 leh Vocational Training and Testing Centre 6 a nei a ni.