ZPM Party-ah inlungrual lohna a awm loh thu sawi

ZPM Party-a PAC Member TBC. Lalvenchhunga chuan an party-ah inlungrual lohna a awm lo niin a sawi.

ZPM Party hian Aizawl-a an Party Office-ah nimin khan Chhung Inkhawm neiin he hunah hian ZPM Party-a PAC Member leh Adviser to Chief Minister TBC. Lalvenchhunga chuan duhthusam ni bik lo mah se, sawrkarna lo chelh tawhte ai chuan an thawk tha rih tho tho tih sawiin, “Ngaihdan inang lo chu a awm thin, hei hi thil pangngai a ni, ZPM party-ah inlungrual lohna awma min puhna erawh hi chu a dik lo,” a ti a. “Tunhnaiah a ngai te bawkin 'Pu Duha, Pu Sapa' tih a ri leh tawh. He party-ah hian lungrual lohna a awm lo. PAC thurel te a leak a, thu veivir ching, kan kehchhiat pawi ti lo hi chu an awm a ni. Kan kehchhe dawn lo, kan insiam tha zel zawk ang,” a ti bawk.

ZPM-ah Senior leh Junior an awm loh thu pawh TBC-a chuan sawiin, “ZPM hi kan zavaia kan siam a ni,” a ti a. Party mite chu mahni hmasialna leh duhamna tel lova ram leh hnam tana ngaihtuahna seng tura ngenin, “Kan CM leh Minister-te an mawi hian kan zavaiin kan mawi a, thil dik lo an tih loh nana fimkhurpui turin party hruaitute kan pawimawh. Huaisen tura kan inzirtirna te hi hre rengin, thil dik lo ti turin nawr lo ang u. 'Kei chu ka chan ngam ang e' ti ngam ang u. Mipui hi kawng dikah kan kaihruai ngam tur a ni,” a ti bawk.