Telecom Advisory Committee thutkhawm neih a ni

Mizoram Lok Sabha MP leh Telecom Advisory Committee (TAC)-a Chairman Richard Vanlalhmangaiha hovin nimin khan Aizawl-a Chief Wildlife Warden Conference Hall-ah TAC thutkhawm neih a ni a, he hunah hian Lok Sabha MP chuan sawrkar laipui Scheme hrang hrang PM Poshan, VB-G RAM G, NREGA leh a dangte hmanga mipuite'n Geo-tagging an tih zung zung theih nan khaw tinah Network tha pe turin BSNL hotute chu hma la turin a hrilh a. Hemi rual hian Project pawimawh tak tak – DBN 4G Saturation Project, BOP-BIP Project, Indo-Myanmar Project leh a dangte pawh hlawhtling taka thawh zawh a nih theih nan theihtawp chhuah turin a fuih bawk. He hunah hian BSNL Mizoram Business Area General Manager, BP. Meena chuan Mizoram chhunga Telecom hmasawnna tura hma an lak dan tlangpui a tarlang a. Phase-IX.2 hnuaiah 4G Tower thar 111 bun a nih thu leh 4G Saturation Project hnuaiah Tower 30 bun thar a nih thu sawiin, heng te hian hmun kilkhawr leh network awm ngai lohna khua ah te nasa takin Mobile Connectivity a siamtha tih a sawi bawk.