MP (RS) thlang dawn; Congress leh BJP in Vote thlak dawn lo

Mizoram in Rajya Sabha-a Seat pakhat a neih ve luahtu tur, Member of Parliament (MP) thlanna atan Vawiin hian Vote thlak a ni dawn ta.
Election Commission of India in ruahmanna a siam angin Mizoram Rajya Sabha MP thlanna atan hian tukin dar 9:00 atang hian Vote thlakna hun hi hawn a ni dawn a, Rajya Sabha MP thlanna ah hian MLA ten Vote an thlak thei dawn a, tlai dar 4:00 thlengin Vote thlakna hun hi hawn a ni ang. He inthlanna ah hian rorellai ZPM party Candidate K. Laltluangkima leh MNF Candidate Zothansangi Hmar te an inkhing dawn a, Vote tla te hi Vawiin tlai dar 5:00-ah chhiar nghal a ni ang.

Nimin-a MPCC-a thuneitu sang, PAC thukhawm chuan Rajya Sabha MP thlanna neih tur chungchang leh MNF atanga an Candidate Vote pui tura sawmna chu ngaihtuahin, MNF chu rorellai ZPM Party te ang thova kan ram, kan hnam, kan Sakhua himna atana hlauhawm BJP nena puan inzarzawm an nih avangin an MLA te chuan vote thlak lovin hai(abstain) mai se an ti a. Hetihlai hian BJP MLA pahnih te pawhin Vote an thlak dawn lo nia thudawn a ni bawk.