Larsap hovin International Day of Yoga hman a ni
National AYUSH Mission, Directorate of AYUSH bultuma 34 Assam Rifles Helipad, Zokhawsang-a International Day of Yoga puala hun hman hi Larsap General (Dr) Vijay Kumar Singh chuan hmanpuiin Prime Minister Narendra Modi hmalaknain Yoga chu khawvel pum hriat hlawh leh ngaihven a nih thu sawiin, khawvel puma hman theih tura UNO-in a pawmpui atanga International Day of Yoga hman in kum 12-na hmel a hmu ta chu lawmawm a tih thu a sawi a. Yoga chu taksa, rilru leh ngaihtuahna te tha taka thlunzawma hriselna tha thlentu a nih thu sawiin, Yoga exercise hrang hrangte chuan taksa leh rilru hrisel nan tinzawn leh hnathawh dan bik an neih hran theuh a, tangkai taka hman a nih theih nan tih dan dik, Common Yoga Protocol zawm a tul thu a sawi bawk.
He hunah hian khual zahawm leh Health Minister Lalrinpuii pawhin khawvel hmun dangte ruala Mizoramin khawvel pum huap hriselna lam hawi hmalakna lian leh pawimawh tak, International Day of Yoga puala hun hman a ni chu lawmawm a tih thu a sawi a. Chief Secretary Khilli Ram Meena pawhin Mizoram sawrkarin mipuite hrisel nan AYUSH kaltlanga hma a lak zel dawn thu sawiin, pipu atanga thiamna chhawm zel leh tunlai thiamna thar ber berte tangkawp kaltlangin mipui hriselna tihhmasawn zel tum a ni tih a sawi.
International Day of Yoga pual hian District Hospital, Health & Welness Centre, Zirna In leh pawl hrang hrang ten an remchan dan ang zelin hun an hmang bawk a. Kumin-a thupui ‘Yoga for Healthy Ageing’ tih hian a tum ber chu rilru leh taksa hrisel tak nen upat hun hmang thei tura Yoga chhawr tangkai a ni.