Rajya Sabha MP atan K. Laltluangkima thlantlin a ni
Mizoram in Rajya Sabha-a Member pakhat a neih theih angin Rajya Sabha Member tur thlanna hi nimin khan neih niin Aizawl-a Assembly Annexe Main Building Committee Room-ah Vote thlakna hi buatsaih a ni a, he inthlan ah hian Candidate pahnih ZPM atangin K. Laltluangkima leh MNF Party atangin Zothansangi Hmar-te awmin Vote thlak hnuhnung ber ZPM MLA, TBC. Lalvenchhunga chuan nimin chawhma dar 11:00 vel khan Vote hi a thlak a, heti hian ZPM MLA 27 zingah mi 26 ten Vote hi thlakin Tuichang Bialtu MLA W. Chhuanawma chuan hriselna dinhmun that loh vangin Vote a thlak lo a. MNF MLA 10 ten Vote thlakin BJP MLA pahnih leh Congress MLA pakhat in Vote an thlak lo thung a ni.
He inthlanna a Vote tla te hi nimin tlai dar 5:00 khan chhiar nghal niin Vote chhiar zawh a nih hnu nizan dar 7:00 vel khan Election Commission of India atangin pawmpuina hmuh a nih hnuah ZPM Candidate K. Laltluangkima chu Mizoram Rajya Sabha MP atan thlanlin a ni tih puan a ni a, Vote tla 36-ah K. Laltluangkima hianVote 26 hmuin MNF Candidate Zothansangi Hmar chuan Vote 10 a hmu bawk a ni.
ZPM Party chuan Mizoram Rajya Sabha MP thlanna ah an Party Candidate thlantlin a ni chu lawmawm an tih thu nimin khan thuchhuah siamin an tarlang a. “Rajya Sabha inthlana ZPM party MLA vote thlak thei ten ZPM 'Official candidate' an vote vek thei hi party inlungrualna leh thawhhona thatzia lantirtu a ni a. Hetihlai hian damlohna avanga Election Commission-a 'home voting' dil sak Pu W. Chhuanawma erawh phalsak a ni ta lo thung,” tiin kum 2026 atanga kum 2032 thlenga Rajya Sabha Member of Parliament ni tur K. Laltluangkima chu ram leh hnam tana theihtawp chhuah turin duhsakna an hlan thu an tarlang bawk.