Serchhip-ah Nasha Mukt Saptah hmang tan dawn
Zirtawpni khan Serchhip District Level Committee on Nasha Mukt Bharat Abhiyan Committee chu an Chairman leh Bawrhsap Paul L. Khuma hovin a Pisa-ah an thukhawm a, he hunah hian tun thla ni 26-a ‘International Day Against Drug Abuse & Illicit Trafficking’ lo thleng tur leh Nasha Mukt Saptah (Drug-Free Week) hman dan tur hi an sawiho a. Sub-Deputy Commissioner Lalchhanhimi chuan he Hapta hman chhunga sawrkar Department hrang hrangte leh mipuite tih ve tur chanvo (action plan) te ngaihthlak a ni a. Mipui te'n ruihhlo laka fihlim tura intiamna - Online Mass Pledge te, Signature Campaign te, Media kaltlang Awareness Programme te, ruihhlo ngaite tan Health Camp te, Yoga-Meditation te, Walkathon/a huho a kawngzawh leh Two Wheeler Rally te bakah, College zirlaite tan Slogan-Writing Competition te chu he Drug-Free Week/Nasha Mukt Saptah chhung hian neih tura ruahman a ni.
He thutkhawm ah hian Bawrhsap Paul L. Khuma chuan Ruihhlo do kawngah sawrkar leh mipuite tanrual a ngaih takzet thu sawiin, he Hapta hman mekah pawh hian mipuite'n ruihhlo that lohzia leh ram leh hnam hmelma a nih dante hre thar leh a, uar lehzuala ruihhlo laka kan fihlim theih nan mahni hmazawn theuha theihtawp chhuahpuiah Serchhip mipuite a sawm a ni.
Ruahman lawk dan chuan Nasha Mukt Saptah (Nasha Mukt Week) denchhen hian ni 4 chhung hun hman a ni dawn a, Vawiin hian a hmasa ber atan ‘Student-Centric Awareness Day’ atan hman a ni anga, Vawiin hian Programme chi nga (5) hman tur niin mipui zirtirna chi hrang hrang te tihchhuah a nih dawn bakah thutiam lakna leh Signature Campaign te neih a ni dawn a ni.