Mizo Taxi mobile app-a inziaklut an la tlem; Pawl pathum ten an la dodal zel thung
.jfif)
Transport Department-a thawktute sawi danin, Mizo Taxi mobile application hmang turin June ni 19, 2026 (Zirtawpni) thleng khan Two Wheeler Taxi 80, Four Wheeler Taxi 75 leh Auto Rickshaw pakhat an inziaklut tawh a, document fello vanga hnawl (reject) lirthei 20 a awm thung a. Aizawl khawpui chhungah hian 'Mizotaxi' app hi July ni 1, 2026 atanga hman tan tur a ni a. Aizawl khawpui chhunga Service lai Four Wheeler Taxi te, Two Wheeler Taxi leh Auto Rickshaw zawng zawng te chu June, 2026 chhungin Mizotaxi Office, DTO (L.A) Office hnuai, Transport Complex, Chaltlang-ah Registration tifel vek tura ngen leh hriattir an ni a. Mizo Taxi application hi playstore/appstore-ah download theih turin dahfel a ni tawh a, a hman tan theih hun chu July ni 1, 2026 atangin a ni ang.
Hetihlai hian Mizo Taxi Mobile application hi Mizoram Taxi Association (MTA), Aizawl Two Wheeler Taxi Association (ATTA) leh Aizawl District Auto Rickshaw Owner Association (ADAROA) ten an la dodal thung a, zawhna chhangin, Mizo Taxi mobile application chu an la dodal zel tih sawiin, an member te chu he application a inziaklut lo turin an ngen a. MTA leh ATTA hruaitute chuan an member ni lo Taxi khalh mi engemaw zat an awm tih sawiin, tuna inziaklut te pawh an member ni lo an nih a rinawm tih an sawi bawk.
Taxi-a eizawng heng pawl pathum te hian State Transport Authority (STA) in rate hman tir a tum chu hman chi ah an ngai lo tih an sawi bawk a. Heng pawl pathum hruaitute hian Zirtawpni zan khan MTA Office, Dawrpui-ah Joint OB Meeting neiin Mizotaxi Mobile Application chungchangah hruaitu te hmalakna a tawp thleng a thlawp an tum tih an sawi a. Thuchhuah an siamah pawl pathum aiawhte chuan Mizotaxi online Booking System that tawk lohna lai ni a an hriat, sawrkar a an thlen te a hlawhtlinna hmuh tur a la awm lo chu hriatthiam har an tih thu sawin, tunlai ei leh bar, khawsakna sang zel leh Oil man to chho zel nen STA in March, 2024 daih tawh a rate a siam sak hman tir a tum chu hman chi ah an ngai lo tih an sawi a. Rate awm tawk sawrkar-ah ziaka an thehluh tawh chu sawrkar hian pawm sak thei se an duh tih an sawi a ni. Hei bakah hian pawl pathumte chuan Registration fee Rs 500/- an chawi ngai tur leh mipui Taxi/Auto Rickshaw hmangtu ten an hman apianga chhiah (tax) 6%- 10% an chawi zel a ngai tur chu tha an ti lo tih an sawi a, Chhiah khawntu atan hman a tum pawh an duh lo tih an sawi bawk.
Tarlan tawh angin State Transport Authority (STA) chuan Mizo Taxi-ah hun tiam chhunga mipui mamawh khawp lirthei in-register an awm loh chuan, a tul angin 'Mizo Taxi' hnuaia tlan tur permit pek belh a nih tur thu a tarlang tawh a ni.