MSCU Assembly hmanpui

Mizoram State Cooperative Union (MSCU) Annual General Assembly vawi 37-na chu nimin khan Aizawl-a Vanapa Hall-ah neih niin Cooperation Department changtu Minister PC. Vanlalruata chuan khuallian niin a hmanpui.

MSCU Annual General Assembly-ah hian Cooperation Minister chuan Cooperative Society-te chu Mizoram hmel tidanglama, State Economy tithang theitu an ni tih sawiin, Sawrkar pawhin Cooperative Society-te hmasawn zelna atan Mizoram Cooperative Joint Mission hnuaiah ‘Profit-making Cooperative Society’ (hlawkna tel thei Cooperative Society) sangkhat (1000) tal din tura rawtna chu Ministry of Cooperation-ah an thehluh tawh tih sawiin, Society tinte chuan Annual Turnover rate cheng vaibelchhe khat tal neih theih an inbeisei thu a sawi a. Hemi anga an hlawhtling thei a nih chuan member-te income pawh 100% a pun dawn thu sawiin, he Mission-ah hian cheng vbc. 303 lai kum 3 chhunga implement theihna tur proposal thehluh a ni tawh tih a sawi bawk.

Minister chuan Central sawrkarin White Revolution 2.0 Initiative (bawnghnute tharchhuah tihpunna) a kalpui mek bawhzuina atan Mizoram sawrkar chuan MULCO leh NDDB (National Dairy Development Board) te chu MoU a sign pui tawh thu a sawi a. He inremna kaltlang hian bawngpui tha 1000 tal kum thum chhunga lakluh theih a, MULCO-in bawnghnute a tharchhuah pawh litre 15,000 chuanga a pun theih ngei beisei a ni tih a sawi a. MULCO tihchangtlun zualna (revitalization) initiative-ah hian cheng vbc. 24.10 (Central sawrkar tum: vbc. 16.78 leh Mizoram sawrkar tum: vbc. 7.32) ruahman a ni tih sawiin, Silk Samagra 2.0 Scheme hnuaia ‘Integrated Muga Silk Development Project’ atan cheng vbc. 5 approve a nih tawh thu leh ‘Integrated Sericulture Post-processing Hub’ atan cheng vbc. 125 budget atan ruahmanna siama thehluh a nih thu a sawi bawk.