Kolasib District-a National Highway dinhmun enfiah

Kolasib District chhunga National Highway NH 306 & 06, Vairengte leh Khamrang inkar thawmthat leh siamthat hna thawh chu Inrinni khan Kolasib Addl. Deputy Commissioner B. Malsawmtluangi hovin enfiah a ni a. Tun dinhmunah kawngpui hi a tlangpui thuin lirthei tlan nuam tawk tura siam a ni tawh hlawm a. Amaherawhchu, hmun engemaw zatah tlan harsa khawpa chhe zual lai a la awm bawk a. Hemi chungchangah hian kawng siamtu NHIDCL hotute chuan report pein, kawng chhe zual bikte hi tui put vang leh a hmun leilungin a zawh loh vang hrim hrima chhe hma bik a nih thu an sawi a. Heng hmun chhe zual tak takte hi Concrete Pavement tura rawtna pawh thehluh a nih tawh thu an tarlang. Kolasib Addl. DC chuan kawng siamtute chu theihtawp chhuaha hma la zel turin a chah a. Khualzin leh lirthei tlante himna leh awlsam nan kawng chhe zualpui laite chu endika chhinchhiah zung zung a, a rang thei ang bera thawmthat hna thawk thuai thin turin a ngen bawk a ni.