UD&PA Minister hovin Lunglei hmasawnna tur sawiho a ni

Urban Development & Poverty Alleviation (UD&PA) Minister K. Sapdanga hovin nimin khan Lunglei Convention Centre-a LMC Board of Councillors (BoC) Meeting Hall-ah Lunglei-a MLA-te, Lunglei Municipal Council (LMC) hotute leh UD&PA Official-te chu Lunglei khawpui hmasawnna tur sawiin an thukhawm a. He hunah hian UD&PA Minister chuan khawpui hmasawn nan Lunglei-a MLA-te leh LMC hotute nen engkim inhrepawh leh inlungrual tlang taka thawhho a pawimawh thu sawiin, UD&PA hnuaia Lungleia hmasawnna hnathawh hrang hrang chu Municipal kuta awm tur leh sum thawkchhuak tur, sum pawh LMC suma lut tura duan a nih thu a sawi. Minister hian Lunglei-a UD&PA Department hnuaia hmalakna hrang hrangte pawh a tlawh nghal bawk a ni.