National Rural Drinking Water Programme sum hman danah fello tam tak a awm niin tarlang

Comptroller and Auditor General of India report hnuhnung berah thingtlanga chengte'n hnianghnar taka tui thianghlim intur an neih theihna atana ruahmanna, National Rural Drinking Water Programme (NRDWP) kalpuina tura Mizoram-a sum hman danah thil felhlel tam tak a awm tih tarlan a ni.

Tun thla ni 13-a Mizoram Legislative Assembly a pharh tak ‘Report of the Comptroller and Auditor General of India on Social, Economic and Revenue sectors for the year ended 31 March 2017’-a tarlan danin National Rural Drinking Water Programme hi Mizoram PHE Department-in kum 2009 a\anga a kalpui a ni a, CAG-in an sum hman dan a endiknaah chuan kum 2017 a thingtlanga mihring cheng zahve (mihring 2,61,000) chu tui in tur thianghlim mi pakhatin nitin litre 55 a chenna In-ah emaw, a In a\anga metre 100 bial chhungah emaw a dawng tur a ni tih a ni a. Kum 2017 a zirchiannaah erawh chuan hetianga tui in tur dawng hi thingtlanga mi cheng za zela 21 (mihring 1,80,000) chauh an ni a. Aizawl District thingtlang khua-ah mi 13,035 (za zela 13) leh Champhai District-ah phei chuan mihring 4,278 (za zela 6) chauhvin an dawng pha a ni.
Hetihlai hian PHE Serchhip WATSAN Division-in cheng nuai 51 senga Phaibawkkawn tui lakna an siam chu kum 2017 May thla khan zofel vek tawh anga ziak a report a ni a. Mahse, kum 2017 June thla a sum hman dan endiktute leh PHE hotute'n a hmuna an enfiah chuan he hna hi thawh a la awm lo hrim hrim tih an hmuchhuak a. Bill lem siamin tuidawt cheng nuai 28.1 man lei angin an lan tir a. Cement concrete hmanga tui dah khawlna zem siam angin Bill lem an thehlut bawk. Hmanraw leina Rs. 1,20,000/- bakah hnathawktu rawihna senso atan Rs. 21,60,000/- hmang ral angin an lantir a ni.
CAG report chuan NRDWP Guideline ang chuan kum 2017 ah chuan thingtlanga khawsa mi nuai 5.23 te nitin tui thianghlim litre 55 pek tur anih laiin nuai 1.08 chauh pek a ni a, hei hi a pumpui a\anga chhutin 21% chauh pek anih bakah sawrkar School leh Anganwadi te chu tui in tur thianghlim pek an nih dan tarlan a ni lo a. Kum 2012-2017 inkar chhung hian State Laboratory chuan \um 7261 tui a thianghlim leh thianghlim loh enfiah (test) tur an nih laiin \um 3506 chauh an test a, an test tur zat an tlin lohna hi 52% niin a tarlang bawk. 

Comments

Popular posts from this blog

PAN CARD an tih teh fo hi - Laldinpuia