Blood Processing Fee atan vbc. 2 dil mek

Health Minister, Dr. R. Lalthangliana'n kum 2019-20 chhunga thisen sawngbawlna, Blood Processing Fee atan Budget Estimate-a cheng vbc. 2 dah turin Finance Department-ah dil mek a ni tih a sawi.

He thu hi Congress member, Zodintluanga Ralte-in sawrkar-in thisen man a dah leh dah loh a zawhna chhanga sawiin Health Minister chuan, thisen man atan sawrkar-in sum a dahloh thu leh thisen sawngbawlna atan erawh chuan sum hi dah a ni tih a sawi a. Tun sawrkar kum kal mek 2018-19 chhunga hman lailawk turin cheng nuai 50 dah a ni a, hemi bakah hian Cabinet Meeting-in a remtih angin sawrkar kumthar 2019-20 chhunga thisen sawng-bawlna man atan sawrkar chuan Budget Estimate-a cheng vbc. 2 dah turin Finance Department-ah dil a ni tih a sawi.

Dr. R. Lalthangliana chuan, thisen sawngbawlna man tihtawp a ni chuan mimal enkawl damdawi In-a awmte a la huam ve rihloh thu leh hei hian sawrkar damdawi In te chauh a huam rih thu a sawi a, thisen sawngbawlna hi Unit khat Rs. 550 vel a ni a, hei hi sawrkar-in a tum dawn tak avangin damlo mamawhtute hnen a\anga thisen sawngbawlna lak \hin chu tihtawp a nih thu a sawi. Thisen man lak a nih leh nih loh chungchangah hian zawhna neitu, Zodintluanga Ralte chuan, MNF party chu Oppsition an nih laia thisen man tia sawitu an ni tih sawiin, sawrkar fawng vuantu a nih hnuah thisen man a awm loh thu sawitu an ni ve leh ta chu lawmawm a tih thu a sawi thung a ni.