Mizoram CEO in hmanpui

Nimin khan All India Radio (AIR) chuan Mizoram District hrang hranga a hnuaia News Correspondent-te tan ‘Orientation Workshop on Coverage of General Elections’ an buatsaih a, he hun hi Mizoram CEO, Asish Kundra chuan a hawng a ni.

AIR Conference Hall, Tuikhuah-tlang, Aizawl-a Orientation Workshop hawnna inkhawm hi AIR Asst. Director (News), Subhasis Chanda chuan kaihruaiin Mizoram CEO, Ashish Kundra chuan thlaleh maia MP Inthlan tur atana Mizorama inbuatsaihna kal mek zel dan leh Media-te pawimawhna tur kawng hrang hrang a sawi a; a bik takin Radio chu hmun hla leh kilkhawr deuh te, ramri hnaih khua-a chengte tan a pawimawh em em tih a sawi a. Nikuma Mizo-ram State Election tluang taka zawhfel theih chu a lawmawm a tih thu leh Media-ten an thlawp \hat thuah lawmthu a sawi bawk a. MP Inthlan pawh felfai leh dik taka zawhfel a nih theih nan Media-te an \angkai em em dawn a, candidate bik emaw party bik emaw duhsak lovin, hleih nei miah lova mipuiten an hriat tur dik tak chanchin leh an hriat tur thil pawimawhte thehdarh turin a chah bawk.

Rampumah inthlan reng rengah \halai vote thlak duh aia an tlem \hin chu pawi a tih thu sawiin CEO chuan, Mizoram-ah pawh nikum MLA inthlanah \halai voter an tlem thu leh tun MP inthlanah \halaite vote thlak tura chawk phur turin ‘Brand Ambasaador’ 20 chuang an ruat thu a tarlang a. Mizo \halaite chuan Social Media zingah Instagram (IG) an hman nasat ber avangin IG-ah follower ngah mi 20 chuang thlanchhuah niin anni chu an IG post-ah te MP election lam hawi thilte leh an \halaipuite vote thlak tura sawmna siam turin an ruat tih a sawi bawk.

Mizoram CEO, Ashish Kundra chuan tun MP Election-ah hian Mizoram Electoral Roll-ah mi nuai 7 chuang an awm zingah a vawikhatna atana vote thlak tur ‘first time voter’ chu mi 52,000 an ni tih a sawi bawk.