ACB in dilna thehlut mek

Kolasib DIET-a zirtirtu pension tawh leh boral tawhte Training kal \hin ang leh an hminga TA/DA lak a nih chungchang chhui chiang turin ACB-in Chief Vigilance Officer hnenah a dil mek tih School Education Minister, Lalchhan-dama Ralte-in House a hrilh.

Nimin a Assembly Budget Session-ah ZPM Member, Vanlal-thlana'n kum 2012-18 chhunga Kolasib DIET hnuaia training hrang hranga thil dik tawk lo awm nia lang sawrkar-in a bawhzui dan a zawhna chhanga he thu hi sawiin School Education Minister chuan, he thil hi chhui mek a nih thu leh Kolasib DIET Principal chu insawifiah tura tih a nih angin a insawifiahna pawh dawn a ni tawh a, hei hi zirchian mek a ni tih a sawi a ni.

Education Minister, Lalchhandama Ralte chuan, he thil diklo nia sawi chungchang hi ACB-ah thubuai thehluh a nih vang leh he thilah hian hrem ngai an awm a nih chuan thil ti diklotu te zawng chhuaka hrem an nih theih nan Principal chu a hna ngai thawh tir reng a nih chuan lehkha pawi-mawh tihchingpen ni thei dawna a lan avangin Principal chu sawn phawt ni se tih thutlukna an siam a. Hemi ang hian Aizawla SCERT lama awm turin Attachment Order tihchhuah a ni tawh tih a sawi bawk.

He thilah hian Department pawhin beng a chhi reng a, ACB-a thubuai a luh avangin kawng danga hmalak thei a ni rih lo tih Minister chuan a sawi a. He thila mawhphurtu a puh hi Officer a nih avangin ACB chuan a chungchang chhui phalna hi Chief Vigilance Officer (Chief Secretay) hnena an dil tawh thu leh hei hi nghah mek a nih thu a sawi a. He thil ah hian thil dik tawklo awm ni ngeia a lan avangin thudik zawng chhuak tura bawhzui zel a ni dawn tih a sawi a. Member te zawhbelhna chhangin Kolasib nilo hmun danga DIET hmalakna thil diklo awm ni a sawite pawh enfel zel tum a nih thu a sawi bawk.