Ramri-a insumdawnna ngaih pawimawh tum

ZPM leh Congress party-in an thlawp Independent Candidate, Lalnghinglova Hmar chuan Lok Sabha MP atana thlantlin a nih chuan ramri a insumdawn tawnna (Border Trade) chu a ngaih pawimawh turte zinga mi a nih thu a sawi.

Lalnghinglova Hmar hian nimin khan khawchhak tlangdung khaw hrang hrangte tlawhin, Champhaiah thuthar thehdarhtute a kawm a, Lalnghinglova chuan Mizoram hmasawnna atan Border Trade chu thil pawimawh tak a nih thu sawiin, “Thlantlin ka nih chuan Border Trade \ha taka kalpui a nih theihna atan theihtawp chhuah ka tum a ni. Mizoram, a bik takin khawchhak tlangdung tana pawimawh em em a, Indo-Myanmar Border Trade pawh hi a nihna anga a kal loh chhan ka ngaihven anga, anihna anga a kal theihna atan theihtawp ka chhuah dawn a ni,” a ti.

Champhai-a thuthar tharthehdarhtute a kawmnaah thlantlin a nih chuan Journalist Welfare chu a ngai pawimawh dawn tih sawiin, “MP ka nih chuan journalist-te tan sum leh pai lam emaw, a service ang zawng pawhin pawhluh tur tam tak a awm ka ring. Press Tour-te pawh MP kaltlanga buatsaih dan kan zawng dawn a ni,” a ti a, Journalist-te tan training \ha zawk buatsaih dan pawh a zawn tur thu a sawi bawk.

Lalnghinglova Hmar chuan \halai anih angin \halaite hmasawn zelna chu a thil ngaih pawimawh tak a nih thu sawiin, "Sawrkar hna ringawt ni lo, \halaite eizawnna tur kawng hi MP ka nih chuan ka haichhuak thei ngeiin ka ring. Entrepreneurship, Skill Training, Sports, Music, Tourism leh thildang hmangin \halaite tan eizawnna buatsaih sak turin theihtawp ka chhuah ang,” a ti a. MP inthlan turah rulling leh rulling lo an la awm lo tih sawiin, “State-ah chuan MNF an sawrkar tawh a, tluang takin sawrkar se ka duhsak. MP-ah chuan rulling tur kan thlang dawn chauh. Kan vote thlak tur hi a pawimawh a, a tawpa Prime Minister siam theitu a ni,” a ti a, BJP leh kaihhruai NDA an sawrkar tawh lohna atana vote thlak turin mipuite a sawm bawk.