Inthlanpui muanawm neih a nih theih nan Observer in NGO te thawhpui-ah a sawm

Lok Sabha MP thlanna neih tura Serchhip District General Observer tura Election Commission of India in a ruat, Bidol Tayeng IAS chuan nimin khan Serchhip District-a NGO Coordination Committee hruaitute kawmin inthlanna muanawm neih a nih theih nana thawhpui-ah a sawm.
Serchhip District Bawrhsap Pisa-a NGO Coordination Committee hruaitute a kawmna hunah hian Election Observer, Bidol Tayeng chuan India ram hmundang tam takah Election kaihhnawih chanchinthar \halo tak tak hriat tur a awm fo a. Chutihlaiin Mizoram-a inthlanna enpui tura lokal Observer te erawh chuan Mizoram-a inthlanna ralmuan zia leh hahdam zia hahipin an sawi \hin tih a sawi a. Hei hi amah pawhin a mit ngeiin a rawn hmu ta tih sawiin, Mizoram chuan State dangte tana entawn tur a ngah hle tih a sawi a. Retheihna ten ram hi min tibuai deuh \hin mah se, a pawimawh ber chu ralmuanna a ni tih pawh sawiin, “Sum leh pai ngah, ralmuang silo te nun ai chuan harsa deuh zawka lang boruak ralmuang tak hnuaia cheng si te hi an awhawm zawk a ni,” a ti a. Inthlan chungchangah Mizoram People Forum (MPF) te hnathawh dan chu fakin, an thiltihte chhunzawm zel turin a fuih bawk.
He hunah hian NGO Coordination Committee hruaitute pawhin hma an lo lak \hin tawh dan te Observer hnenah hian an hrilh a. Tun \um Lok Sabha Election atan pawh NGO zawng zawngte MPF-ah an inchhunkhawm vek thu sawiin, ralmuang tak leh dan bawhchhiatna awm lova District chhunga inthlanna kalpui a nih theih nana an ruahmanna te an hrilh ve bawk a ni.
Bidol Tayeng hi Arunachal Pradesh mi niin IAS AGMUT Cadre 2007 Batch a ni a, tunah hian Arunachal Pradesh sawrkar-ah AH&Vety, Geology & Mining leh DM&R Secretary hna te a chelh mek a. Tun Lok Sabha Election, 2019 atan hian Champhai District leh Serchhip District-ah te General Observer hnathawk turin Election Commission of India chuan a rawn tir a ni. Nimin a Observer in NGO Coordination Committee te a kawmnaah hian Serchhip DEO, Sangchhin Chinzah, Addl. DEO, Chuauhnuna leh K. Saitluanga, Media Nodal Officer ten an \awiawm a ni.

Comments

Chhiar Hlawhte