Bru Relief Camp-a awm te Vote thlak dan tur sawrkar aiawh leh Camp-a awm ten an sawiho

Nimin khan Mizoram Addl. CEO, Krishna Mohan Uppu hovin Tripura, Kanchanpur khuaah Tripura Bru Camp a awm ten Lok Sabha inthlanpui neih tura vote an thlak dan tur chungchangah Tripura Sawrkar aiawhte leh Bru Relief Camp aiawhte an inhmukhawm.

April ni 11-a Mizoram Lok Sabha bial khat inthlanpui lo awm tura Tripura Relief Camp 6-a Bru vote nei awm mi 12,000 velin Kanhmun khua a vote an thlak theihna turin ruahmanna siam mek a ni a. Election Commission of India in Tripura Bru relief Camp a awm Mizoram a vote nei te’n Kanhmun khua a Special Polling Station 15-ah vote an thlak tura a tih angin Tripura Bru Camp 6 a awm ten vote an thlak dan tur chungchanga ruahmanna an sawiho a ni a. Ruahman lawk dan chuan inthlanpui vote thlak ni-ah Tripura Bru Camp hrang hrang 6 a Mizoram a vote neite chu Tripura sawrkar in Mizoram ramri Damcherra Bazar (Kanhmun khaw bul, Langkaih lui ral lehlam) thleng an rawn hruai anga, heta \ang hian an vote thlakna tur Kanhmun Special Polling Station chu hnaite a nih tawh avangin ke in an kal ang. Tripura Sawrkar in Bru camp 6 a\anga vote thlak tur a ramri thlenga a hruaina senso zawng zawng chu Mizoram sawrkarin a tum vek dawn a ni.

Nikum November ni 28-a Kanhmun khelmual leh Hall-a Polling Station 15 a vote thlak tura Bru lokalte phurhna'n khan lirthei (LMV) 420 leh Bus 178 hman a ni a, Bus hi Relief camp lian ber Naisingpara a vote neite phurhna atana hman a ni. Naisingpara-ah hian vote nei 4,245 zet an awm a. Relief Camp te ber Khakchangpara-ah chuan vote nei 396 chauh an awm thung a. Relief Camp zingah hian Naisingpara a hla ber a, KM 55 vel a hla a ni a, Asapara chu KM 50 a hla niin Hazacherra chu KM 40 a hla a ni a. KM 26 a hla Hamsapara a awm laiin Khakchangpara chu KM 4 a ni a, Kaskau chu KM 3 vel leka hla a ni.

Hetihlai hian Tripura Relief Camp a Bru awmte laklet leh hun tura nikum September thla bithliah chu kumin March ni 31 thleng pawhsei a nih thu tunhnai khan Home Minister, Lalcham-liana'n a sawi a. Tunah inthlanpui a awm dawn avangin a hun ruahman theih hun tur hi a la hriat loh a ni. Sawrkar laipui leh Mizoram sawrkarin Bru lakletna an buatsaih leh anmahni thu a lokir hi chhungkaw 1,681 tling tawhin, Mamit, Kolasib leh Lunglei District-ah te inbenbeltir an ni a. Kum 2016 November a a hmun ngeia official-te'n an endiknaa Mizoram mi dik tak ni a hriatte chu chhungkaw 5,407 an ni.