Serchhip-ah ‘World Water Day’ hmangin Tuihna humhalh a \ul zia inzirtirna neih a ni

Nimin khan Serchhip-ah PHE Department hnuaia Swachh Bharat Mission (Gramin) huaihawtin 'World Water Day' hman a ni a, he hun hi Serchhip District Bawrhsap, Sangchhin Chinzah chuan khuallian nia hmanpuiin tuihna humhalh leh a awmsa venhim a \ul zia inzirtirna atan hman a ni.

Serchhip DC's Conference Hall-a World Water Day puala inkhawm ah hian Serchhip District Bawrhsap, Sangchhin Chinzah chuan khawvel pumin Tui pawimawhna chu a hriat thu leh mitin te pawhin kan hriat theihna turin UN chuan hetiang hian khawvel puma hman turin 'World Water Day' hi a ruahman thu a sawi a. Tui chu mitin in kan mamawh leh a tel lova kan awm theihloh a nih thu sawiin, heng a pawimawhna hrang hrangte hi midangte hnena zirtir chhawng tur leh tui hna humhalhna kawnga nasa lehzuala \an la turin he huna kalkhawmte chu a chah bawk a ni.

Nimin a Serchhip-a World Water Day puala inkhawm hi PHE Serchhip WATSAN Division-a Sr. Executive Engineer, Er. F. Lalsanglura chuan kaihruaiin Mizoram chu tlangram a nih avangin tuilakna-ah te pawh tlang leh mual hran ami lak \hin a ngaih thu sawiin, tunah chuan hmun hniam zawk ah tui lak tur hi zawn a ngai ta zel tih a sawi a. Tui chu kan hriselna, mihring tana kawng hrang hranga \angkai a nih thu sawiin, Mizoram-ah pawh tuihna humhalha a awmsa tipung turin YMA nen thawhhona \ha tak an neih thu a sawi a. Mizote zingah mahni ei leh in tur Tui te Tur hmanga ti bawlhhlawh duh leh mahni ei ngei tur Sangha te pawh Tur hmanga hrai duh an awm \hin te chu thil pawi tak a nih thu sawiin, Tui venhim leh humhalh chu kan vaia mawhphurh a nih thu a sawi bawk.

He hunah hian Serchip Sub-Hqrs. YMA President, R. Sanghmingthanga pawhin thu sawiin Serchhip District chhung khaw hrang hrang ten hnianghnar taka Tui kan hmuh theihna tura PHE Department-a thawk te hmalakna chu lawmawm a tih thu a sawi a, Mizoram khaw hrang hrang 777-a Tuikhur tui te chu a kangchat \an mek zel tih sawiin, tunah hian khawl hmang lova Tui lak tur pawh a tlem tawh thu a sawi a. Tuihna venghima tipung tura nasa lehzuala \an lak a \ul thu sawiin, tun ang renga kan kal a nih chuan reilote ah Thlaler ramro kan ni mai dawn tih a sawi a, YMA in hmun hrang hranga Social Forestry an neih te chu kan ram sik leh sa tinuamtu mai bakah tuihna humhalhna \ha tak a nih thu a sawi bawk.

Nimin a 'World Water Day' puala inkhawm ah Serchhip khawpui chhunga YMA Branch hrang hrang aiawh leh Serchhip District chhung khaw tina WATSAN Committee bakah PHE Department hnuaia thawktute telin Er. Samuel L. Ralte, SDO PHE East Lungdar Sub-Division chuan a lem nena entirin Tuihna humhalh a \ul zia leh hmalakna tur te a tarlang a, khaw hrang hranga WATSAN Committee te hnena an hmalakna atana hman tur Rs. 10,000/- \heuh hlan a ni bawk.

Serchhip-a 'World Water Day' hman hi nimin zing khan Serchhip Bazar-ah a hawnna neih a ni a, he hun hi Samuel Lallawmzuala, District Coordinator, SBM(G) chuan kaihruaiin Er. F. Lalsanglura, Sr. Executive Engineer, PHE Serchhip WATSAN Division leh Er. K. Lal-rintluanga, SDO Serchhip ten thu an sawi a, he huna kalkhawmte chuan he Ni puala thuchham an sawirual bawk a ni.

World Water Day hi kum 1992-a Rio de Janeiro (Brazil)-a United Nations Conference on Environment and Development neih ah hman rawt a ni a, kum 1992 December thlaa UN General Assembly chuan hei hi pawmin kumtin March 22-a hmang turin a rel a, heta \ang hian kumtin hman chhoh niin thupui hrang hrang neia hman a ni \hin a. Kumin hian 'Leaving no one behind' tih chu thupui atan hman niin he thupui hmang hian inzirtirna neih a ni.