PRISM Party in Lok Sabha inthlanpuia an Candidate tur hovin Serchhip an rawn tlawh

PRISM Party chuan nimin khan Serchhip-ah thuthar thehdarhtute kawmin MP Inthlanpui lo awm tura an Candidate tur phochhuahna an nei a, PRISM Party Candidate, TBC. Lalvenchhunga chuan Citizenship Amendment Bill (CAB) chungchanga hma la tak tak chu PRISM Party chiah an nih thu a sawi.

Nimin a Jemela Hotel, Serchhip Bazar-a PRISM Party in thuthar thehdarhtute an kawmna hun hi PRISM President, Vanlalruata chuan kaihruaiin PRISM Party in Lok Sabha MP Candidate tur an puan a\anga an zinchhuahna hmasa berah Serchhip an tlawh thu sawiin, nikum a Mizoram MLA inthlanpui neih kha PRISM Party chuan an chuh thu leh an tan chuan bul\anna a nih thu a sawi a. Mi tam zawkin an Party thiltum te chu \ha an ti chungin an la vote ngam lo tih sawiin, “MP-ah kan ding leh a, PRISM Candidate ka vote dawn ti hmun tinah an kat nuk tawh a ni,” a ti a. “Ram, Hnam leh Sakhua awmze neia awm kan duh a. CAB hi keini tluka duh lo leh do tak tak party an awm lo. UN thlengin kan nawr tawh a. Kan nawr zel bawk ang,” tiin hemi atan hian an MP Candidate te chu Vote \heuh turin mipuite chu a sawm a ni.

PRISM President chuan an Party chu Independent duh Party an nih thu sawiin, India hnuaia awm reng duh ni lo an nih thu a sawi a. Mizote chu Nation hran nei leh ram bik neia awm kan nih thu sawiin, kum 1885 vel a\anga British sawrkar in min awp hnuah \hendarh kan nih thu sawiin, Mizoram leh Chin area chu kan ram a nih thu a sawi a. Tunhma lama ram pahnih-a mipuite zalen taka kan intlawhpawh theih thu leh amaherawh chu tunah hian India leh Myanmar ramri hnaih a Zofate zalen taka intlawhpawh theiha kan awmna chu tihtawp tumna a awm mek nia sawiin, hei hi kaltlangpui a nih chuan Visa tello chuan intlawhpawh theih a nih dawn tawhloh thu a sawi a. Chutihlaia India sawrkar in CAB hman tuma hma a la chu an duhloh thu leh hemi duhlo a Party hrang hrangte hmalakna chu an dukhawploh thu a sawi bawk.

He hunah hian MP inthlanpui lo awm tura PRISM Candidate, TBC. Lalvenchhunga chuan thu sawiin Mizo \halaite chuan Mizoram chhungah hnathawh tur kan neih mumal loh thu leh rampawn a hna thawk turin kaihruaitu kan nei mumal leh si lo tih a sawi a, MLA inthlan dawn leh MP inthlan dawnah pawh Candidate tura sawmtu a neih ve thu sawiin, amaherawh chu Mizoram in innnghahna bulfuk nei Party hruaitu kan neih mumal loh thu leh hei vang hian kalphung thar, innghahna bulfuk hruaitu nei PRISM Party chu zawm a nih thu a sawi a.

CAB chungchang pawh sawiin PRISM Party Candidate chuan party hrang hrang te hmalakna chu an duhkhawploh thu leh Parliament-ah he Bill pass lo tura Vote loh chu dodalna a nih loh thu leh kan duhloh zia rampum hriattir chu a pawimawh zawk a nih thu a sawi a. “BJP a sawrkar leh a, Parliament-ah a ngai anga CAB pass luih tum anih chuan Right to Secession bill hi ka pu lut ang,” a ti.

Zawhna hrang hrang a dawn \hin thu pawh sawiin TBC. Lalvenchhunga chuan, “Kum 15 India sawrkar hnuaia ka thawh hnuin ka pension a, ram leh hnam hi ka vei hle. Politic hi ka duh-thlanna a ni a, ka luhchilh tawh hi ka bansan mai dawn lo,” a ti a. MP atan thlantlin a nih chuan MP Fund te chu tute emaw tih lungawi nana tlem te te a hmang lovin Capital Investment atan a theih anga hman a nih dawn thu a sawi a, India leh Bangladesh te ramri-a insum-dawntawnna chu tun aia \ha zawka kalpui a nih theih nan hma a lak dawn thu leh \halaite tan kawng hrang hranga sul sutu nih a tum thu a sawi a, MP pakhat nei Mizoram MP in hna a thawk thei a ni tih lantir a tum thu a sawi bawk.

PRISM Party Candidate leh amah \awi-awmtute hian nimin vek khan Champhai lam an pan leh nghal a ni.