Lok Sabha inthlanpui nei turin Serchhip District-ah inbuatsaihna muanawm taka kalpui mek a ni

Serchhip District Election Officer, Sangchhin Chinzah chuan nimin khan Serchhip-a tualchhung thuthar thehdarhtute a Pisa-a leng-ah sawmin Lok Sabha MP inthlanpui lo awm tura inbuatsaihna hrang hrang a sawipui a, harsatna leh buaina awm lova inbuatsaihna hi kalpui mek a nih thu a sawi.

Nimin-a Serchhip District Bawrhsap Pisa-a thuthar thehdarhtute nen an inkawmna ah hian District Bawrhsap, Sangchhin Chinzah chuan Election Commission of India in Lok Sabha inthlanpui neih tur a puan a\angin Serchhip District-ah pawh tihtur \ul ang ang te buaipui nghal a nih thu sawiin, inthlan buaipuitu Team hrang hrangte pawhin an hna tur \heuh an thawh nghal thu a sawi a. Nikum kumtawp lama MLA inthlanpui neih ang politics boruak erawh tun \umah hian a awmloh thu sawiin, inthlanpui boruak a san loh thu leh campaign boruak pawh a muanawm hle tih a sawi a. Expenditure Monitoring Team hrang hrangte pawh Dan anga siam ni mah se hnathawh tur an la nei mumal meuhlo tih sawiin, Election Commission of India in ruahmanna thar a siam, Flying Squad Team ten DEO-ah direct a complain an thehluhna tur app, Cvigil chu tun thlengin hmang an la awmloh thu te, mipui ten inthlan kaihhnawih an hriat duh an hriat theihna tura a thlawna Telephone hmanga an biak theihna tur Phone No. 1950 chu zing dar 9:00 a\anga zan dar 9:00 thleng duty awm mah se hmang \angkai an la awmloh thu te leh tun thleng hian Campaign Office hawn dilna an la dawnloh thu a sawi a. Media Certification & Monitoring Committee (MCMC) hnuaiah pawh dilna dawn an la neihloh thu leh sawiin, Political Party te a\ang emaw pawhin Model Code of Conducts (MCC) bawhchhiatna chungchangah complain an la dawn loh thu a sawi a. Amaherawh chu inthlang tur kan nih avangin Dan in a phut angin inbuatsaihna chu engkim kalpui vek a nih thu a sawi bawk.
Thuthar thehdarhtute zawhna chhangin District Election Officer chuan tun \uma Lok Sabha inthlanpui neih turah hian Serchhip District-ah vote nei mipa 24,758 leh hmeichhia 25,524, an vaiin vote nei mi 50,282 an awm thu a sawi a, heng mite Vote thlakna tur hian Polling Station pawh 77 ruahman a nih thu a sawi a, Polling Station awm zawng zawng a\anga zaa 10, Polling Station 8 chu Hmeichhia te chauh duty-na tur, Dingdi Polling Station tia vuah a nih dawn thu sawiin, heng te hi 26-Serchhip (ST) AC-ah Serchhip-VI, Serchhip-XI leh New Serchhip-III te; 27-Tuikum (ST) AC-ah Phulmawi, Buh-kangkawn leh Chhiahtlang-III leh 28-Hrang-turzo (ST) AC-ah Chekawn leh Bungtlang-I Polling Station te a nih thu a sawi a. Polling Station hrang hranga duty tur Polling Party 77 bakah 30% reserve siam niin heng mite hian training hmasa ber an neih tawh thu a sawi a. April 4 leh 5-ah training hi chhunzawm leh a nih tur thu a sawi bawk.
Tun \uma Lok Sabha inthlanpui neiha venhimna hna thawk tur hian Serchhip-a Police awmsa te bakah State pawn a\angin CRPF leh State Armed Police Force (SAPF) te an rawn thleng tawh a, heng bakah hian 2nd IR Bn. a\angin Sipai engemaw zat rawn kal tura ruahman mek an ni bawk a. He inthlanpui neih tura inbuatsaihna hi Serchhip District vil tura ruat Observer, Bidol Tayeng chuan a hmunah a vil reng bawk a ni. Hei bakah hian DEO chuan nikum lama MLA inthlanpuia lo tih tawh angin PwD te pawhin awlsam taka Vote an thlak theihna turin ruahmanna hrang hrang siam a nih thu a sawi a, hemi chungchangah hian tlawmngai pawl leh MPF te nen pawh thawhhona \ha tak an neih leh a beisei thu a sawi bawk.
Nimin a DEO in thuthar thehdarhtute a kawmna hunah hian Addl. DEO, Chuauhnuna, SDO (Sadar) R. Vanrengpuia leh District Information & Public Relations Officer, K. Saitluanga te pawh an tel bawk a ni.

Comments

Chhiar Hlawhte

Thu diklo thehdarh thu ah Police ten Serchhip-ah mi 4 an man