Mizoram CEO in inthlan chungchanga Mizoram hmingthanpui benghniam lo tura venhim \ul ti

Mizoram Chief Electoral Officer (CEO), Ashish Kundra chuan Mizoram in inthlanna felfai leh muanawm a buatsaih \hin, ramchhungah pawh a hmingthanpui chu a benghniam thei tur chi laka venhim zel \ul a tih thu a sawi.
Nimin a chanchinbumi \henkhat leh chanchinbu-a thuziak \hin mi \henkhat a kawmnaah Ashish Kundra chuan he thu hi sawiin, Tripura Camp-a awm Bru te avanga inthlan dawn hnaiha harsatna thleng \hin chu pawi a tih thu a sawi a, tun \um Lok Sabha inthlanna neih turah pawh heng Bru te tana Kanhmun-a Special Polling Station siam sak chu Mizoram a tlawmngai pawl ten an dodal thu amah pawh an hriattir tawh tih sawiin, NGO-te thil ngaihmawh chu a hriatthiampui thu a sawi a, hetihlai hian inthlan boycott ang chi zawnga hmalak erawh a chinfelna tur nia a hriat loh thu sawiin, boruak muanawm tak hnuaia hlawhtling taka inthlanna buatsaih chu mipui rorelna democracy tih ngheh zelna tura thil \ul a ni, a ti.
Mizoram CEO, Ashish Kundra chuan nikum kum tawpa Assembly inthlanpui neih \uma Kanhmun-a vote thlak tir an nih khan boruak muanawm tak hnuaiah Bru ten vote an thlak a, khawtlang hruaitu leh YMA te pawhin a \ul apiang buaipuiin, an ei leh in tur thlengin an lo buatsaih sak a, a hnua Electoral Roll siam\hat hna thawh chhunzawmna ah pawh Bru sang chuang chu boruak muanawm tak hnuaiah Kanhmun-ah bawk an inlan leh a, khang thilte khan Mizoram mipuite a\anga anmahni tih \haihna lam chi a awm lo tih a lantir a, hei hi NGO te thil duh ber nawr zuina atan pawh thil \angkai tak a ni zawk dawn a ni, a ti a, Bru te chungchanga buaina chu awmze nei a chinfel zui ngai nia a hriat thu sawiin, inthlan boycott erawh a chinfelna ni lova a hriat thu a sawi bawk.
Tarlan tawh \hin angin Mizorama tlawmngai pawl hrang hrang intelkhawmna, NGO Coordination Committee chuan Tripura Camp-a awm mek Bru te a huhova Kanhmuna vote thlak tir tum an nih chuan Lok Sabha inthlanna boycot an tum thu an lo puang tawh a, hetihlai hian Election Commission chuan nikum kum tawpa Assembly inthlanna neih \um ang tho khan Lok Sabha inthlanna neih turah pawh Bru te tan Kanhmun-ah Special Polling Station siam turin Mizorama inthlan buaipuitute a hriattir thung a. Hemi atan hian sawrkar pawh a theih angin a in buatsaih chho mek a ni.

Comments

Chhiar Hlawhte