MNF an tlin chuan NDA-in MP pakhat an neih belh dawn a, BJP an tlin nen a inang reng - Lalduhoma

ZPM hruaitu Lalduhoma chuan Lok Sabha inthlanpui ah BJP leh MNF te chu an thawk dun ni mai lovin thuhmun an ni tih a sawi a. “MNF an tlin chuan NDA-in MP pakhat an neih belh dawn a, BJP an tlin nen a inang reng a ni,” a ti.
Lok Sabha MP inthlanpui lo awm tura INC leh ZPM in an thlawp Lalnghinglova Hmar tana nimin a Seling, Keifang, Saitual, Dulte leh Khawzawl khuaa a campaign-na ah he thu hi sawiin Lalduhoma chuan, “NDA hi Mizo mipuiten kan hriat chian a ngai a, BJP-in a din, BJP sawrkar theihna tura din a ni,” a ti a. Mizoram a\anga BJP sawrkar tir tuma MNF-in hma an la leh NDA an ni lui tlat chu vanduaithlak a tih thu a sawi a. India rama Hindu lal ram din tumtute MNF-in an thlawp ta mai chu mak a tih thu sawiin, “A nationalist ber tura ka ngaih a ni lo lam hawia an kal hi Pu Laldenga kha lo tho leh se a rilru a nat ka ring,” a ti a; Central sawrkar sum it avanga kan hnam tana thil pawi pawh ti duh tlat kan nei chu vanduaithlak a tih thu leh MNF-in CAB kalpui luih tiamtu NDA an thlawp chu a dem thu a sawi bawk.
ZPM Leader, Lalduhoma chuan inthlan chi hrang hrang a awm thu leh Issue hrang hrang a awm thu pawh sawiin, “Tuna kan issue hi Zu zawrh a ni tawh lo a, Sawhthing lei a ni tawh lo a, District lam pawh a ni lo. Lok Sabha-a kan aiawh roreltu tur kan thlang dawn a, BJP lam\ang leh lam\ang lo kan buk dawn a, India ram rorelnaa kan aiawh thlanna a ni tawh. Keini chuan NDA sawrkar nawn tir kan duh lo a, kan do a, chumi do tur chuan kan intelkhawm a ni,” a ti a, NDA an sawrkar chuan Mizoram, Mizo hnam leh sakhaw tan a pawi tur thu a sawi bawk.
Lalduhoma chuan MP Candidate, Lalnghinglova Hmar vote tura mipuite sawmin, “Mizo \halai, a vanglai taka ram tana thawk tura penchhuak a ni a, a kal ve tawhna lamah Vai leh Sap te zingah pawh zahpuiawm lo, ram vei mi a ni a, MP \ha tak a ni thei ngei ang,” tiin MP atan \halai viak \ha kan mamawh thu a sawi.
He hunah hian Mipui Candidate, Lalnghinglova Hmar pawhin thu sawiin he inthlan lo awm tur hi India rama roreltu tur thlanna a nih thu a sawi a, “Mizoram inthlanna kan neih zawh tak nen khan ngaih pawlh lo hram ila. India rama BJP an sawrkar tawh lohna tura \angrual min vote turin party tina mipuite ka sawm a che u,” a ti a; Mizoram tana hnathawk thei MP, Parliament House-a thusawi mai ni loa thil dangah pawh MP \angkai tak nih zel tur a tum thu a sawi bawk.

Comments

Popular posts from this blog

PAN CARD an tih teh fo hi - Laldinpuia