15th Finance Commission hnenah Mizoram mamawh lo thlen a ni

Ramchhung State hrang hrangte sum hman tura rawtna siam \hintu,15th Finance Commission member-te chuan niminpiah tlai khan State sawrkar-a mi pawimawh te nen inkawmna an nei.
Mizoram rawn tlawhtu 15th Finance Commission member-te hi an Chairman, N.K. Singh bakah Member dang- A.N. Jha leh Dr. Ashok Lahiri leh Member Secretary, Arvind Mehta te an ni a, Aizawl an rawn thlen hnu niminpiah tlai khan Mizoram New Capital Complex Conference Hall-ah Mizoram Sawrkar hotulu - Chief Secretary, Lalnunmawia Chuaungo leh Commissioner leh Secretary te nen meeting chhawng thum an nei a. Meeting chhawng khatna ah Mizoram sum mamawh te thlenin an mamawh chhan te an sawifiah a ni a. Meeting chhawng hnihnaah hian khawpui inrelbawlna leh enkawlna (Urban Local bodies) dinhmun tarlan niin Project proposal thar atana sum mamawh te thlen a ni a. Meeting chhawng thumna ah hian Village Council te tih changtlun zelna atana sum mamawh te thlen niin hengte hi sawifiah a ni bawk.
He Meeting ah hian Chief Secretary, Lalnunmawia Chuaungo chuan Finance Commission hmasa te sum pek (Grant) chu leiba tihhniam nan te leh hmasawnna hna thawh nan te Sawrkarin a hman \angkai thu a sawi a. Secretary (Finance Commission), Lalmalsawma'n Mizoram sum leh pai dinhmun leh sum mamawh dan te tarlanna (presentation) neiin Mizoram economy dinhmun te, Sawrkar sum hnar leh sum hmanna hrang hrang te, State leiba leh leiba rulh dan te, Revenue leh Capital Expenditure inthlauh dan te chipchiar takin a tarlang a. Finance Commission hmasa te sum pek (Grant) chu leiba tihhniam nan te leh hmasawnna hna thawh nan Sawrkarin a hman \angkai thu Chief Secretary hian a sawi a. Mizoram chu khuarel chhiatna a bik takin leimin leh lei tlahniam te a tawh hnem avangin State Disaster Relief Fund leh State Disaster Mitigation Fund atan sum phal taka pe turin ngen a ni bawk.
Mizoram Sawrkar in 15th Finance Commission-ah hian cheng vbc. 94,647.33 a dil a, heng te hi Pre Devolution Revenue Deficit Status atan cheng vbc. 57,737.38; Capital Expenditure mamawh phuhruk nan cheng vbc. 17,357.90; State Asset-te enkawlna atan cheng vbc. 5779.00; 7th Central Pay Commission Mizorama kalpuina atan cheng vbc. 1283.70; State Disaster Relief Fund leh State Disaster Mitigation Fund atan cheng vbc. 1000; Local Bodies (Village Council, Urban Local Bodies, Autonomous District Council-te leh Sinlung Hills Council) atan cheng vbc. 2292.39; Forest Maintainance atan cheng vbc. 1450.00 leh State Specific Needs atan cheng vbc. 7746.96 te a ni. 
Meeting zawh dawnah kharna thu sawiin 15th Finance Commission Chairman, N.K.Singh chuan inkalpawhna, Tourism, Social Infrastructure leh khawpui nun (urbanization) te chu a bika ngaihpawimawh a \ul thu te sawiin, Mizoram Sawrkar in sum mamawh a dil leh a thlen te chu Commission in rilru zau tak pu chungin ngaihtuahin rawtna a siam dawn a ni, a ti.
Finance Commission hi kum 5 dan zela Ram Danpui in a phut angin din a ni \hin a, an hnathawh ber Chhiah hrang hrang a\anga sum tlingkhawm State-te pekchhuah dan leh a zat rawt te, State-te sum mamawh dan lo enfel te a ni a. 15th Finance Commission hi November 2017 khan din niin Sawrkar kum 2020 a\anga sawrkar kum 2025 thlenga State te sum mamawh leh hemi chungchanga rawtna siam tur niin kumin kum tawp lamah an rawtna te hi Central Sawrkar ah thehluh hman an beisei niin tunah hian State 20 an tlawh tawh a, nimin zing khan Mizoram an chhuahsan leh nghal a ni.

Comments

Chhiar Hlawhte