Mizoram in Union Minister a neih theih nan BJP President in an Candidate Vote turin mipuite a sawm

BJP Mizoram Pradesh President, Prof. JV. Hluna chuan Lok Sabha MP inthlanpui neih turah BJP kaihhruai NDA chu sawrkar leh ngei tur dinhmun ah a ding nia sawiin, Mizoram in Union Minister kan neih theihna turin Mizoram-a BJP in MP-a an Candidate chu Vote \heuh turin Mizoram mipuite a sawm.

Nimin-a Jemela Hotel, Serchhip-a thuthar thehdarhtute a kawmna hunah Prof. JV. Hluna chuan Lok Sabha MP thlanna neih turah hian  BJP kaihhruai NDA chu an sawrkar leh ngei dawn nia an hriat thu sawiin, Central-ah pawh Minister ni tlak ngei tura an ngaih chu an Candidate thu a sawi a, an Party hruaitute pawhin an Candidate chu thlantlin a nih chuan Union Minister-ah dah an tum thu thu sawiin, Lok Sabha (Parliament House) chu Football chungchang emaw, Pathian thu emaw sawina hmun tur ni lovin ram hmasawnna tur sawina hmun a nih avangin an Candidate chu hetiang tura rintlak ber nia an hriat thu a sawi a. MP atan Politician ni lo leh Lok Sabha \hutkhawm pawh la ngaithla ngailo te vawrhchhuah an ni \hin chu thil fuhlo tak nia a hriat thu pawh sawiin, MP te chu State sawrkar in Project an siam leh Budget te bawhzui tur ringawt an nih loh thu a sawi bawk.
Prof. JV. Hluna chuan Citizenship (Amendment) Bill 2016 chu Parliament-a a Lapse hnuah BJP chuan tharthawh leh an tum thu pawh sawiin, hemi chungchanga BJP National President, Amit Shah-a’n a sawi chu a thusawi ang la tluan lovin thehdarh a nih thu a sawi a, Amit Shah hian India hmarchhak State te him ngei ngeina tur Provision an telh tur thu a sawi chu a thusawi thehdarhtute hian an thehdarh tello niin a sawi a. Parliament-a Bill lapse tawh reng reng a ngai ngaia pharh leh chu thil awm ngailo a nih thu sawiin, he Bill pawh hi tharthawh a nih dawn chuan siam\hat ngei a nih dawn thu a sawi a. He Bill pass avanga Chakma te rampawn a\anga rawn lut ruih ruih tura ngaihna chu a diklo tih pawh sawii, Mizoram-a Chakma awmsa te chuan rampawn a\anga Chakma rawn lutru tur chu an dang \ang \ang zawk \hin tih a sawi bawk.
BJP Mizoram State President chuan MP inthlanpui-ah hian an Party chuan Nirupam Chakma chu an Candidate tih sawiin, ani hi tunhma a\anga Mizoram-a khawsa nghet, a pa a\anga Mizote zinga mikhual lo leh a pa pawh UT kan nih laia MLA a nih thu a sawi a, State kan nih hnua MLA inthlanpui neih hmasak ber khan Congress Ticket-a thlantlin a nih thu leh MLA atan vawi 5 thlantlin niin Minister pawh kum 10 zet alo nih tawh thu a sawi a. Mizoram-a Lengpui Airport siam a nih dawna kutthlak hmasa ber tu pawh a nih thu a sawi a. Hetianga politician tawnhriat ngah a nih avang hian MP pawh nise Mizoram tana \angkai ber tur a nih avangin Mizoram mipuite chu an Candidate hi vote pui \heuh turin a sawm bawk.
Thuthar thehdarhtute zawhna chhangin Prof. JV. Hluna chuan NDA leh NEDA-ah MNF leh BJP chu an thawhdun thu sawiin, MNF te chu khulam-a inti NDA hle siin helam ah chuan an ten thung si tih a sawi a. Candidate siam chungchangah a hrana Candidate siam lova MNF Candidate thlawp mai pawh an rawt thu sawiin, amaherawh chu MNF lam hian an duhlo niin an sawi a. BJP in MP inthlanpui-ah Chakma Candidate neih chu \ha an tih ber a nih loh thu pawh sawiin, amaherawh chu nikum-a Mizoram in MLA inthlanpui a hmachhawn ah Mizo mipui ten BJP an vote duh lo tih a lan tawh avangin, Mizoram-a minority ten an vote duh tur Candidate a dah a ni ta tih an sawi a, minority ten an vote bakah Mizoram hmundanga BJP ten an lo vote pui ve bawk chuan tling mai thei an nih thu an sawi bawk.
Nimina  thuthar thehdarhtute a kawmna hunah hian Prof. JV. Hluna hi K.Vanlalruati, IT & Social Media Convener leh BJP Serchhip District-a President, KH. Rohlua leh Secretary, Johan-a ten an \awiawm a ni.

Comments

Popular News (Last 30 Days)

LPG man bithliah thar