Latest News

Zu khuahkhirhna Dan siamna tur Bill pass a ni

Mizoram-a Zu khapna Dan siamna tur ‘The Mizoram Liquor (Prohibition) Bill, 2019’ chu niminpiah khan Mizoram State Legislative Assembly-ah pass a ni ta.
Mizoram-a Zu khapna tur Dan thar, ‘The Mizoram Liquor (Prohibition) Bill, 2019’ puluttu Excise & Narcotics Minister, Dr. K. Beichhua chuan Mizo mipuite taksa, rilru leh thlarau mai bakah an eizawnna, chhung-kaw inrelbawlna, zirna leh hnathawhna thlenga suasamtu Zu zawrh phalna Dan, ‘The Mizoram Liqour (Prohibition & Control) Act, 2014 tihtawp a nih a, heng chhiatna hrang hrang thlentu Zu khapna Dan, ‘The Mizoram Liquor (Prohibition) Bill, 2019’ a nih thu a sawi.
Excise & Narcotics Minister Dr. K. Beichhua chuan, Zu khap a nih hnuah chuan dan bawhchhiate chu mi tu pawhin an man theih dawn thu sawiin, “Mimal leh pawlte pawhin an man thei dawn a, amaherawh chu, a rang thei ang berin Excise & Narcotics leh Police hnenah an hlan tur a ni,” a ti a. Draft Bill-ah chuan, Excise & Narcotics leh Police-a Assistant Sub-Inspector leh a chung lamte'n case an khawih theih dawn tih tarlan a ni. Dan hnuaia thuneitute'n phalna bik an pek a nih loh chuan, Mizoram-ah mi tu pawhin zu an lakluh, thawn chhuah, kawl, lei leh hralh, zu siam leh zu inte khap a ni dawn a, The Mizoram Liquor (Prohibition) Bill, 2019 hi a taka hman a nih chuan, Zu zawrh laia sawrkar in Chhiah a hmuh \hin cheng nuai 7,000 vel sawrkarin a hloh dawn a ni.
Niminpiah a Assembly House-a he Bill sawihona hunah hian House Leader, Zoramthanga chuan MLA inthlan dawnah sawrkarna an siam chuan Zu khap an intiam tih sawiin, Zu zawrh hlâwk ti te chu a aia hlâwk zawk SEDP hnuaiah an siamsak dawn tih a sawi, “Zu hi tirêm vek thei lo mah ila, thui tak kan chingfel ang,” a ti bawk.

Comments

Popular News (Last 30 Days)