Zirtirtu nei miahlo sikul 13 awm mek; Zirtirtu lak phalna ECI ah thlen a ni

School Education Minister, Lalchhandama Ralte chuan Mizoram hmun hrang hrangah zirtirtu indaihlohna a nasa hle tih sawiin, tun dinhmunah zirtirtu nei miahlo sikul 13 a awm mek tih House a hrilh a, MP inthlanin dal mah se zirtirtu indaihlohna a nasat em vangin April thla sikul tan hma ngeia zirtirtu lak phalna ECI ah an dil thu a sawi bawk.
Nimin a Assembly Session zawhna leh chhanna hunah Thorang bialtu Congress Member Zodintluanga Ralte zawhna chhangin, Education Minister chuan zirtirtu post ruak te chu a tam thei anga hnawhkhah tum a nih thu leh heng post ruak hnawhkhah rual hian zirtirtu indaihlo leh zirtirtu siamrem ngai School te a tahtawl a siam rem zel tum a nih thu a sawi.
Member te zawhbelhna chhangin Education Minister Lalchhandama Ralte chuan, sawrkar thar a din tirh phat a\angin zirtirtu indaihlohna phuhru turin hmalakna an kalpui nghal char char thu a sawi a, zirtirtu post ruak 2300 chuang zet a awm mek vangin zirtirtu indaihlohna a nasat thu leh tun dinhmunah zirtirtu nei miahlo School 13 Mizoram-ah a awm mek thu a sawi a, heng School ah te hian a pangngai anga zirna an kalpui theihna turin an bulhnai khua a zirtirtute chu hmui rih tura tih an nih thu a sawi a, hei hi MP election in zirtirtu semrual leh indaih zawk theihna tura an hmalakna a dal rih vang niin a sawi a. Zirtirtu lak belh vat a nih loh chuan Class indaihlohna a nasat thu Education Minister chuan sawi bawkin, uluk takin Department in zirchianna a kalpui mek zel thu a sawi a. Sawrkar laipuiin inkaihhruaina dan a siam ang chuan zirtirtu pakhatin naupang 30 vel enkawl tur a ni tih sawiin, tunah hian Mizoram bikah chuan zirtirtu pakhatin naupang 13 vel zel enkawl ang an ni a, hei hi phai lam nen mihring cheng zat a inan loh bakah Mizoram chu thingtlang khaw tereuh te te-a an awm an nih hlawm avangin sawrkar laipuiin inkaihhruaina dan a siam chu zawm hleihtheih a ni lo tih a sawi a. Hetiang hi thil awm dan ni mah se, zirna siam\ha tura chak zawka hmalak erawh sorkar chuan a tum hle tih a sawi bawk.
Zirtirtu transfer rawn dil an tam thu leh heng transfer ah hian bialtu MLA te rawn tur an nih thu Lalchhandama Ralte chuan sawiin, “Heng transfer rawn dil te hi bialtu MLA te hnenah kan thlen zel a, a thei ang berin zirna kalpui kan tum,” tiin, "Opostion MLA pawh nise rawn zel turin department thawktute pawh thurawn ka pe,” a ti bawk.
Aizawl North-II bialtu MLA, Vanlalthlana zawhna kal zelah zirtirtu indaihlohna phuhru tura sawrkar hmalak mekna \henkhat sawiin Lalchhandama Ralte chuan, Academic Session thar 2019-20 ah zirtirtu indaih zawka kal thei tura hmalakna an kalpui chu MP inthlan Model Code of Conduct in a dal mek tih sawiin, heti chung chung hian inthlan zawh hnu April 11 hnu lama zirtirtu lak belh phalna Election Commission of India (ECI)-ah dilna an thlen tih a sawi bawk.

Comments

Popular posts from this blog

PAN CARD an tih teh fo hi - Laldinpuia