Phaibawkkawn tana tuilakna hna thawh Serchhip-a thuthar thehdarhtu ten an tlawh

MJA Serchhip District Member te chuan nimin khan PHE Serchhip WATSAN Division in Phaibawkkawn tana tui lakna an siam chu a hmunah tlawhin an enfiah a. PHE Department hotu leh WATSAN Committee te chu he hnathawh chungchanga thil fello awm nia CAG Report in a tarlan chungchang an zawtfiah bawk.

Tunhnaia CAG Report-a lan danin, PHE Serchhip WATSAN Division-in cheng nuai 51 senga Phaibawkkawn tui lakna an siam, kum 2017 May thlaa zawhfel tawh anga ziak a report a nih laiin kum 2017 June thlaa sum hman dan endiktute leh PHE hotute'n a hmuna an enfiahnaah he hna hi thawh a la awm lo hrim hrim tih hmuhchhuah a ni a. CAG Report-ah chuan Phaibawkkawn tui lakna atan hian Bill lem siamin tuidawt cheng nuai 28.1 man lei anga lantir a nih thu leh Cement concrete hmanga tui dahkhawlna zem siam angin Bill lem an thehlut bawk tih tarlan niin, Hmanraw leina Rs. 1,20,000/- bakah hnathawktu rawihna senso atan Rs. 21,60,000/- hmangral angin an lantir a ni a.

Hemi chungchang hi thuthar thehdarhtute chuan PHE Serchhip WATSAN Division-a Sr. EE, Er. F. Lalsanglura chu zawtfiahin Er. F. Lalsanglura chuan Phaibawkkawn tuilak hi kum 2016-17 chhunga National Rural Drinking Water Programme (NRDWP) hnuaia thawh tura ruahman niin, Estimated Amount Rs. 56,56,000/- a ni a, 1st instalment March 2017 khan Rs. 50,90,400/- hmuh a ni a, pawisa lo kal hmasa hi Pipe 50mm dia - 6500.00 Rm. lei nan hman a ni a, hnathawhna tur hmanraw dang GI Specials, Pipe fitting, laying te, carriage te, tui point siamna, pipe support, footpath atan sawrkar kumtawp a nih avangin ziahfel lailawk nghal a ni a. Rs. 1,20,000/- chu Deposit-III-ah dah a ni bawk a. Pipe hi lo thleng mai tura ngaih laiin kawng chhiat avangin motor lian chu a tâng a, a hunah a lo thleng thei ta lova. Hna pawh chu \an mai theih a ni ta lo tih a sawi.

June 9, 2017-ah Accountant General a\angin Performance Audit nei tur lo kalin, a hmunah an en thu sawiin, hetah hian hnathawh \an hmuh tur chu ala awm lo ngei tih a sawi a, hna thawh mai theih loh chhan, Pipe thlenloh thu hrilhfiah an nih thu leh Pipe thlen veleh hna chak taka thawh a nih tur thu te PHE lam chuan an lo hrilh tih pawh sawiin, kawng chhiat avanga motor a lo thlen theih loh avangin Zuangtui PHE Store-ah dah a nih hnuah Phaibawk-ah June 28, 2017-ah pipe chu phurh thlen a ni ta a, July 6, 2017-ah hna pawh thawh zui niin, December, 2017-ah tui tihthlen a ni a, hlawhtling takin Phaibawk tui lak chu zawh a lo ni ta tih sawiin, Estimate-a thawh tur Tuizem 40,000 litres dawng te, tui point te, intake etc. te chu siam zawhfel an ni a, 2nd Installment Rs. 5,65,600/- chu November 21, 2017-ah dawn leh a ni a, 2nd installment leh D-III-a dah Rs. 1,20,000/- chu Tuizem leh Intake Bill pek nan hman a ni a. Phaibawkkawn tuilak nana pawisa ruahman Rs. 56,56,000/- hi Phaibawkkawn tui lâk nana hman ngei a ni tih a sawi bawk.

Phaibawkkawn tuilak entu MJA Member te hnenah hian Hmingthanzama, Chairman WATSAN Committee leh a thawhpuite chuan an khua chu In 23 vel an nih thu leh anmahni belhtu neuh neuh bakah an khaw \henawm - Seling, Zero Point te leh hmun danga mite pawhin an tui lak chu an chawi \hin thu an lo hrilh a, Estimate-a tui point pahnih (2) awm tura tih pawh PHE-in panga (5) lai an siam belhsak thu sawiin, March 15, 2018 khan an kutah hlan a nih thu a sawi a. He hna thawhna ah hian diklo taka thil tih a awm an hriatloh thu leh \ha tak hna zawhfel a ni chu lawmawm an tih thu sawiin, tui pawh an hniang-hnar rih hle tih an sawi a. Tunah hian tui lakna hmun remchang dang pawh ngaihtuah belh zel a nih thu an sawi bawk.

Helai hmun tlawhtu MJA Member te chuan he hna hi hna thawh zawhfel tawh anga ziak laiin hna la thawh \an ni lo mahse a hnuah hlawhtling taka thawh zawh a ni tih an sawi a ni.