Serchhip District chhung, Hmuntha khua in Hlumpui ram-a Greenhouse Cluster atanga Tomato an tharchhuah te chu nimin khan sengin hralh turin vailiam nghal a ni a. He hun hi Adviser to Chief Minister (Technical) Er. K. Lalsawmvela chuan khuallian niin a hmanpui a ni.
Mizoram-a COVID-19 hri kai hmuhchhuah chu ala tlahniam thei tak tak lo a, niminpiah khan Sample 4829 enfiah atangin hri kai 468 hmuh leh niin Sample enfiah atanga za zela 9.69 te chuan hri an kai a ni.
Tunhnaia COVID-19 hri kai tam tak hmuhchhuahna Lawngtlai District chhunga Longpuighat khawtlang chuan, Health Minister hnenah an khua ah Medical Team tir tur leh Longpuighat PHC chu a nih dan tur anga kalpui thuai turin an ngen.
COVID-19 hripui leng dona kawnga Mizoram sawrkarin hma a lak dan leh a inbuatsaih dan rawn zirchiang tur Central Team of Experts Member pahnihte chuan nimin khan Health & Family Welfare Minister, Dr. R. Lalthangliana chu a Pisa-ah an kawm.
Mizoram Journalists' Association (MJA) Kolasib District Member te chuan tunhnaia Assam Sawrkar in Mizo Leilet a nawrchhiat sakna hmun Buarchep, Phainuam bul chu nimin khan an tlawh.
Serchhip District-ah African Swine Fever (ASF) avanga Vawk thi an la awm belh zel avangin Serchhip Mualvawm-a Slaughter House ram-ah Vawk phumna tur laih belh leh a ni.
National Bank for Agriculture and Rural Development (NABARD) chuan nimin khan an kum 40 tlin lawmna neiin Cooperation leh Agriculture Department changtu Minister, C.Lalrinsanga chuan khuallian niin a hmanpui a ni.
RT-PCR Lab for Chhimbial-in Lunglei-a RT-PCR khawl bun chungchanga High Court-a an zualkona kal zelah Mizoram sawrkarin tun dinhmunah Civil Hospital, Lunglei-a RT-PCR Laboratory dah chu a remchan loh thu leh Lunglei District tan RT-PCR Laboratory mamawhna a awm loh thu High Court a hrilh.
Niminpiah khan Mizoram-ah Sample 5304 enfiah niin heng atang hian COVID-19 hri kai 519 hmuhchhuah leh an ni a, Mizoram-a hri kai hmuhchhuah chu 24,702 zet an tling tawh a ni.
Mizo Zirlai Pawl (MZP) General Headquarters hruaitute chuan Mizo thalai tam tak te chu ramri humhalh duh vanga thisen hial chhuak tawh an ni tih sawiin, ramri chungchang lemchanna (Drama) awm thin chu an haw takzet tih an sawi a. “'Ramri chinfel dan thuruk ka hria' titu chuan tun hi a thuruk a puan hun a ni dawn lawm ni?” an ti.
Serchhip P&E Veng-a Soil Peng atanga Soil & Water Conservation Department Office panna kawngah Serchhip P&E Veng VC ten tuihawk luankawr (Link Drain/Semi-Culvert) an siam dawn avangin Serchhip SP, Stephen Lalrinawma chuan tun thla ni 17 thleng he kawng hi lirthei kaltlang theihloh, Road Block a nih thu thuchhuah siamin a tarlang.
Serchhip District Consumer Association (SDCA) chuan P&E Department in tun thla-a Electric bill reading la lova an siam chu duh lovin hmalak mek a ni tih an sawi a. Mipui te pawh Electric bill pe rihlo turin an ngen bawk.