Pass awmlohna an hma la dawn

School Education Minister Dr Vanlalthlana chuan kumin HSLC Exam-a zirlai pass awm lohna sawrkar sikul-ah te hma lak a nih tur thu a sawi.

He thu hi nimin-a a Pisa-a thuthar thehdarhtute nen an inkawmhona hah sawiin, Education Minister chuan zirlai pass awm lohna sawrkar sikul te chu Directorate of School Education lamin a chhan chiang taka an zawh tur thu leh chuta tanga hmalak a nih tur thu a sawi a, zirtirtu indaih lohna sawrkar sikulah pawh a theih ang ang a zirtirtu sem rual an tum thu a sawi bawk. 

Thuthar thehdarhtute zawhna chhangin Education Minister chuan sawrkar sikul chu a mamawh apiangte sikul a nih angin, zirlai naupang sawrkar sikul a lut duhte Entrance exam hmanga thlan an nih ve loh avanga zirlai a thiam thiam lak an nih thin loh thu a sawi a, chu chuan kawng engemaw chenah result pawh a pawh fual thin thu a sawi bawk. 

Dr. Vanlalthlana chuan Session tharah pawl 9 leh pawl 10-ah te ‘Intodelh’ inzirtir an tum thu a sawi a, Vocational Education lamah pawh nasa lehzuala ke an pen tur thu sawiin, ZPM Manifesto a tel, UPSC Grooming lam hawi zawnga hma an lak tan tak tak tur thu leh zirlai pawl 10 pass tawhte chu he UPSC Grooming hmanga pawl 11 atanga an chher tan tur thu a sawi a, Mizoram Education Service chungchang pawh sawiin, Mizoram Education Reforms Committee kutah a awm mek thu a sawi.

SEDP Teacher thlakna atana Zirtirtu lak thar turte chu Dan anga taka kalpui a ni dawn tih pawh Minister chuan sawiin, Primary School Zirtirtute chu Interview hmanga lak tur niin Middle leh High School Zirtirtute chu Written Exam hmanga lak an nih tur thu a sawi a. Model Code of Conducts hman mek ala nih avangin pawhfan deuh ala nih thu leh inthlan a zawh velah tihfel tur a nih thu a sawi bawk a ni.