Jail atanga tlanchhuak nia hriat Police ten an man

Champhai Police te chuan nikum November ni 30-a Central Women Jail atanga hmeichhe pathum tlanchhuak zinga pakhat nia hriat, Lalchhanmawii chu Champhai khawdai ah an man.

Champhai Police te hian kar kalta Nilaini khan Champhai bul Khankawn Police Checkgate bulah lirthei pakhat atangin Herion hawng 23, gram 250 chu mi pali, mipa pahnih leh hmeichhe pahnih kut atangin an man a. Ruihhlo neitu a puhte atang hian an lakna chhui zelin Khawmawi, Myanmar-a khawsa Lalchhanmawii hnen atangin an la tih hriat a ni a. An chhuina kal zelah Lalchhanmawii hi Mizoram-ah a rawn chuang chhuak thin tih hriain an vilzui hnuah Inrinni khan Scooter-a Khawzawl pan a tum chu Champhai khaw dai, AOC Petrol Pump thlangah an man ta a ni. Lalchhanmawii hian hming dang a invuah nia hriat a ni a,  Champhai Police te chuan thu zawhfiah turin an kawl mek a ni.

Nikum November ni 30 khan hmeichhe pathum chu Central Women Jail atangin blanket leh puan suihzawmin, Jail bangah an lawm liam a. Inrinni-a an man tak Lalchhanmawii hi ND&PS Act a man niin, an tlanchhuah lai hian a chungthu an ngaihtuah mek niin thudawnna chuan a sawi tel bawk.