India-a Heroin hmang nasa ber Mizoram State

Zirchianna atanga a lan danin, Mizoram chu India rama Heroin hmang nasa ber State a ni a. Hetihlai hian kum 1984 atanga kumin May 10 thleng khan Mizoram-ah ruihhlo vangin mi 1,842 an thi tawh a ni.

Kum 2019 khan Ministry of Social Justice & Empowerment chuan India rama State leh UT zawng zawngah Survey a nei a, chutah chuan Mizoram chu mi cheng zat atanga chhuta Heroin hmang nasa ber niin, a pumpuiah pakhatna a ni a. Hemi bakah hian March, 2024 a India Today-in an zirchiannna an tihchhuahah India ramah Mizoram chu Meizial zu nasa ber State a ni bawk a ni. 

Hetihlai hian Excise & Narcotics Department (END) chhinchhiah danin kumin chhungin May 10 thleng khan Mizoram-ah ruihhlo hmansual vangin mi 32 an thi tawh a, an zingah hian Heroin vanga thi tam berin kum 22-50 inkar mi vek an ni a. Kum 1984 atanga May 10, 2024 thleng khan Mizoram-ah ruihhlo hmansual vangin mi 1,842 an thi tawh a, heng te hi mipa 1,616 leh hmeichhia 226 an ni.

END chhinchhiah danin kum 1984 khan ruihhlo hmansual vanga thi hi Mizoram-ah mi pakhat a awm a, hemi hnu hian ruihhlo hmansual vanga thi awm chho zelin thi tam ber kum chu kum 2004 kha niin mi 143 an thi a, kum 2000-ah mi 139 thi bawkin, kum 2001-ah mi 101 leh kum 2003-ah mi 136 an thi a, heng kumte hi ruihhlo thihpui awm tam kum te an ni.