Serchhip-a Lok Adalat-ah thubuai 28 chinfel a ni

Ramchhung hmundangte rualin Inrinni khan Serchhip-ah Lok Adalat thutkhawm neih a ni a, thubuai 28-ah inremna siam a ni.
Inrinni khan National Lok Adalat chu rampum-ah neih leh niin Serchhip-ah pawh District Legal Services Authority bultumin Lok Adalat thutkhawm hi Ser-chhip District Court-ah neih leh a ni a, tun tumah hian hmun hnih ah Lok Adalat thutkhawm hi neiin Bank Loan puk rulh loh chungchang ah thubuai 20 putluh niin thubuai pathum chinfel a ni a, Settlement Amount chu Rs. 2,14,360/- a ni a. Heng bakah hian Civil Carse dang ah thubuai ngaihtuah tur 37 chhawpchhuah niin thubuai 25 chinfel a ni bawk a, Settlement Amount chu Rs. 31,29,854/- a ni. Heti hian tun tuma Lok Adalat thutkhawm ah hian thubuai ngaihtuah tura chhawpchhuah hi a vaiin 57 a ni a, thubuai 28 chinfel a ni a, Settlement Amount chu Rs. 33,44,214/- a ni.


Lok Adalat hi ramchhung hmundangte rualin Inrinni khan State Legal Services Authority kaihhruaina in Mizoram-a District 8-ah leh Gauhati High Court, Aizawl Bench-ah te neih a ni bawk a, Mizoram pumah thubuai ngaihtuah tur 904 a lut a, chungte chu mimal pawisa inpuktir rul leh thei lo thubuai te, Bank Loan rul tha thei lo thubuai te leh Civil Case hrang hrang te an ni a. Mizoram pumah a vaiin thubuai 298 chinfel a ni a, Pawisa kaihhnawih thubuai chinfel hi Rs. 5,11,50,226/- a tling a ni. Lok Adalat in a rel theih thubuaite hi Criminal Compoundable Case te bakah Civil Case chi hrang hrang an ni a, hetiang rorelna hi Lung In intantir zawnga kalpui a nih ve loh avangin thubuai neitute tan an thlang zawk thin a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man