Hospital hawn tawh la sa zo lo?

ZPM Central Block, Mamit hruaitute chuan Khum 100 awmna tur District Hospital, Mamit building September 26, 2023-a hawn tawh chu nimin khan tlawhin tun thlengin sak zawh ala nih loh thu an sawi.

ZPM Central Block, Mamit thuchhuah tarlan danin, Khum 100 awmna tur District Hospital, Mamit Building hi September 26, 2023 khan khatih hunlaia Health Minister Dr. R. Lalthangliana chuan hawngin Hospital building hawn atanga thla 8 hnu, nimin-a Hospital building an tlawh pawhin building hi siam/sak zawh a la ni lo niin an tarlang a. Hnathawktuten an sawi danin District Hospital, Mamit building hawn a nih lai khan hna hi za zela 60 vel chiah zawh ala nih thu leh tunah hian 93% vel hna hi zawh a ni tawh niin an tarlang a. Hospital building sak hi a design tam tak a fuh tawk lo hle nia sawi bawkin, Room tam zawk phei chu chhun eng-ah pawh ni eng a luh theih loh avangin a thim vek a, tukverh a tlem avangin boruak tha a luh tam theih dawn loh avangin hriselna atan a pawi thei dawn nia a lan thu an tarlang bawk a ni.

ZPM Mamit hruaitute chuan Hospital sak leh design hun lai khan Hospital tha leh changtlung neih aia sum leh pai siamna atana hman an ngaipawimawh zawk emaw tih tur zawka a awm chu pawi an tih thu pawh an sawi bawk a. Khum 100 awmna Hospital building chhawng 5 meuh ah Fire Exit (Emergency Exit) pakhat chiah a awm chu a tha lo in a him lo hle ah an ngai tih pawh sawiin, Hospital thawktute duh dan ang ni lo a Labour Room (Nau neihna) siam a ni chu pawi an tih thu an sawi a, hun lokal zel turah harsatna a awm ang tih a hlauhawm hle niin an sawi bawk.

District Hospital Mamit sakna atan hian cheng vbc. 17.93 ruahman niin, Power Finance Corporation Ltd. CSR atangin 70% (vbc. 12.55) hmuh niin, a bak zawng (30%) hi state sawrkar atangin hmuh a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar