Council of Churches in Mizoram Danpui tur duang

Mizoram-a Kohhrante Inzawmkhawm Pawl, Council of Churches in Mizoram (CCM) dinna tura hmalakna kal zelah Drafting Committee chuan din a nih hnua Danpui (constitution) tur an duang fel ta.

Kar kalta khan Baptist Church of Mizoram (BCM) Headquarters Office, Serkawn-ah Drafting Committee hi an Convener, Rev. R. Lalnunzira kaihhruaiin an thukhawm leh a. April 3-a Synod Office, Aizawl-a CCM Joint Meeting-in tih tur a pekte ngaihtuahin ruahmanna hrang hrang an siam a. Council din hun leh hawn dan tur te leh CCM Budget ruahmanin Constitution an duang fel bawk a ni.

Drafting Committee-in ruahmanna an siamte hi June 11-a CCM Joint Meeting neih leh turah an thlirho leh dawn a, CCM Joint Meeting hnuhnung berah khan Kohhran hrang hrangte chuan Drafting Committee-in ruahmanna a siam leh kalphung tur a duante chu an Kohhran rorelna sangah an thlen thu leh CCM chu din tha an tih thu an tarlang hlawm a, hmalak la ngaite ngaihtuah turin Drafting Committee hi ruahmanna siam tura tih nghal a ni.

January 24, 2023 khan Mizoram-a Kohhran panga - Presbyterian, Baptist Church of Mizoram, Evangelical Church of Maraland (ECM), Lairam Isua Krista Baptist Kohhran (LIKBK) leh Salvation Army te kalkhawm chuan ‘Council of Churches in Mizoram’ din hi an lo rel tawh a. March 28 khan BCM Meeting Hall, BCM Office, Lunglei-ah a ruangam tur duangtu, Drafting Committee thukhawmin Church Council ruangam (structure) hi an duang fel a ni.

CCM-ah hian Mizoram Presbyterian Kohhran, BCM, Evangelical Church of Maraland, Lairam Isua Krista Baptist Kohhran, Evangelical Free Church of India, Isua Krista Kohhran, Bualpui (NG) leh Salvation Army te an tel a ni.